हेटौँडाः चितवन, सिन्धुपाल्चोक र धादिङमा एकैदिन ३ जना मृत फेला परेका छन् । मृत फेला परेको ३ जनाकै नाम, ठेगाना नखुलेको बागमती प्रदेश प्रहरी कार्यालय हेटौँडाले जानकारी दिएको छ ।
चितवन जिल्लाको भरतपुर महानगरपालिका–२, इन्द्रदेवमार्गमा एकजना मानिस मृत फेला परेका छन् । शुक्रबार इन्द्रदेवमार्गमा अन्दाजी ३६ वर्षीय पुरुष मृत फेला परेको प्रहरीले जनाएको छ । मुचुल्कापश्चात् शव पोष्टमार्टमका लागि जिल्ला अस्पताल भरतपुर लगिएको प्रहरीले जनाएको छ । सिन्धुपाल्चोक जिल्लाको मेलम्ची नगरपालिका–७ र ६ को सिमाना न्यौपानेटार एक जना पुरुष व्यक्तिको शव फेला परेको छ । शुक्रबार बिहान ८ बजेको समयमा पहिचान नखुलेको अन्दाजी ५५ वर्षीय पुरुष व्यक्तिको शव फेला परेको प्रहरीले जनाएको छ । शव मेलम्ची खोलामा सडेगलेको अवस्थामा फेला परेको थियो । मुचुल्कापश्चात् शव पोष्टमार्टमका लागि नगर अस्पताल मेलम्ची लगिएको प्रहरीले जनाएको छ ।
यस्तै, धादिङ जिल्लाको थाक्रे गाउँपालिका–९, पिपलचौरमा एकजना पुरुष मृत फेला परेका छन् । मृत फेला पर्ने अन्दाजी ६० वर्षीय पुरुष रहेको प्रहरीले जनाएको छ । शनिबार बिहान ९ बजेको समयमा पुरुष आफू सुत्ने कोठाभित्र नाइलनको पासो लगाई झुण्डिएको अवस्थामा फेला परेका थिए । पुरुषको शव आंशिकरुपमा सडीगलेको अवस्थामा फेला परेको प्रहरीले जनाएको छ । शव नजिकै विषादीकोे २ वटा बोतल फेला परेको र घटनाबारे थप अनुसन्धान भइरहेको प्रहरीले जनाएको छ ।
