हेटौँडाः गाई काटेको आरोपमा पक्राउ परेका धरौटीमा रिहा भएका छन् । शुक्रबार साँझ बकैया–५, स्थित तीनतलेबाट गाई काटेर भाग लगाइरहेको अवस्थामा मकवानपुर प्रहरीले पाँच जनालाई पक्राउ गरेको थियो । सोमबार जिल्ला अदालतले पक्राउ परेकालाई जनही २५ हजार रुपैयाँ धरौटीमा रिहा गरेको जिल्ला प्रहरी कार्यालय मकवानपुरका प्रहरी प्रवक्ता टेक बहादुर कार्कीले जानकारी दिनुभयो ।
बरामद गरिएको गाईको मासु परीक्षणका लागि पठाइएको कार्कीले बताउनुभयो । अभियोग पुष्टि भएमा ३ वर्षको जेल सजाय हुन सक्ने व्यवस्था रहेको छ । पक्राउ पर्नेमा सोही ठाउँका ३० वर्षीय जयराम स्याङ्तान, ४८ वर्षीय दिनेश थिङ, ५५ वर्षीया माइली थिङ, ६३ वर्षीया साइली माया गोले र ४८ वर्षीया सपना स्याङ्तान रहेका रहेका थिए । प्रहरीले ४० केजी गाईको मासुसहित उनीहरुलाई पक्राउ गरेको थियो ।
