हेटौंडाः हेटौँडामा जारी हेटौँडा महिला खेल महोत्सव अन्तर्गत फुटसल प्रतियोगितामा पुरानो फुटबल खेलाडी समुह विजयी भएको छ । महोत्सवको दोस्रो दिन आज शुक्रबार बिहान भएको फुटसलमा हेटौँडा फुटबल एकेडेमी समुहलाई २–१ गोलअन्तरले पराजित गर्दै पुरानो फुटबल खेलाडी समुहले जीत निकालेको हो ।
विजयी भएको पुरानो फुटबल खेलाडी समुहले १५ हजार प्राप्त गरेको छ भने उपविजेता बनेको हेटौंडा फुटबल एकेडेमी समुहले १० हजार रुपैयाँमा चित्त बुझाएको छ । प्रतियोगिता हेटौंडा–४ स्थित हुप्रचौरमा भएको हो । बिहिबारदेखि संचालन भएको खेलमा हिजो बिहीबार ४ खेल सम्मपन्न भएको थियो । आजै दिउँसो २ बजे हुप्रचौरस्थित भलिबल कोर्टमा महिला भलिबल प्रतियोगिता हुँदैछ । भलिबल प्रतियोगिताको विजेता टिमले २५ हजार रुपैयाँसहित शिल्ड, मेडल र प्रमाणपत्र प्राप्त गर्नेछन् भने उपविजेता टिमले १५ हजार रुपैयाँ प्राप्त गर्नेछ ।
