हेटौंडाः मकवानपुर बहुमुखी क्याम्पसका संस्थापक क्याम्पस प्रमुख मुकुन्द दास श्रेष्ठको आठौं स्मृति दिवसका दिन मंगलबार बिहान क्याम्पसमा श्रद्धाञ्जली सभाको आयोजना गरिएको छ । २०७२ सालको भूकम्पमा परी निधन भएका श्रेष्ठको स्मृतिमा क्याम्पसले उहाँको अर्धकदको प्रतिमामा माल्यार्पण गरी श्रद्धाञ्जली व्यक्त गरेको छ ।
क्याम्पस प्रमुख डा. शंकर प्रसाद उपाध्याय, पूर्वविद्यार्थी प्रताप विष्टसहित क्याम्पसका प्राध्यापक, कर्मचारी, विद्यार्थीले स्वर्गीय श्रेष्ठप्रति श्रद्धाञ्जली व्यक्त गरेका छन् । २०३७ सालमा स्थापना भएको मकवानपुर बहुमुखी क्याम्पसमा श्रेष्ठ २०४५ सालसम्म क्याम्पस प्रमुखको जिम्मेवारीमा रहनुभएको थियो । २०७२ सालको भूकम्पमा काठमाडौंमा श्रेष्ठको मृत्यु भएको थियो । मकवानपुर बहुमुखी क्याम्पसको विकासमा उल्लेखनीय योगदान गर्नुभएको स्मरण गर्दै पूर्वविद्यार्थीको अग्रसरतामा गत वर्ष मात्रै क्याम्पस परिसरमा श्रेष्ठको अर्धकदको प्रतिमा निर्माण गरिएको हो ।
