हेटौंडाः मकवानपुर जिल्लाको मनहरी गाउँपालिका–३, हाँडीखोलामा ट्याक्टर दुर्घटना हुँदा ३ जनाको मृत्यु भएको छ भने २ जना घाइते भएका छन् । जिल्ला प्रहरी कार्यालय मकवानपुरका अनुसार सोमबार साँझ ८ बजेर ५० मिनेटको समयमा मकवानपुरको मनहरी गाउँपालिका–३, मिलडाँडाबाट हाँडिखोलातर्फ जाँदै गरेको मधेश प्रदेश ०३–००१ त ७१८८ नम्बरको ट्याक्टर आफैं अनियन्त्रित भई दुर्घटना हुँदा ३ जनाको मृत्यु भएको हो ।
दुर्घटनामा परी मनहरी–३ का २४ वर्षीय राजकुमार प्रजाको हेटौंडा–११ स्थित चुरेहिल अस्पतालमा मृत्यु भएको प्रहरीले जनाएको छ । यस्तै मनहरी–३, हाँडीखोलाका ३० वर्षीय वीरमान रुम्बा र मनहरी–४, सालघारीका २० वर्षीय प्रविण प्रजाको उपचारको क्रममा हेटौंडा अस्पतालमा मृत्यु भएको छ । दुर्घटनामा परी मनहरी–३, हाँडीखोलाका २४ वर्षीय अमृत प्रजा र ४५ वर्षीय जोखलाल प्रजा घाइते भएका छन् ।
घाइते दुबैजना बोल्न सक्ने अवस्थामा नभएकाले के कारणले दुर्घटना भयो भन्ने बुझ्न कठिन भइरहेको मकवानपुरका प्रहरी प्रवक्ता प्रहरी नायव उपरीक्षक टेकबहादुर कार्कीले जानकारी दिनुभएको छ । घाइते दुबैजनाको चुरेहिल अस्पतालमा उपचार भइरहेको छ । घटनास्थलमा प्रहरी टोली खटिएर उद्दार तथा दुर्घटनाको कारणबारे बुझ्ने प्रयास भइरहेको बताइएको छ ।
