हेटौंडाः निर्माण व्यवसायी संघ मकवानपुरमा निर्वाचित सचेत नागरिक युवा समूहका सदस्यलाई सम्मान गरिएको छ । शुक्रबार हेटौंडामा एक कार्यक्रमका बीच सचेत नागरिक युवा समूहका सल्लाहकार अनल श्रेष्ठ, कोषाध्यक्ष नवीन जोशी र सदस्य चेतबहादुर थापा मगरलाई सम्मान गरेको हो ।
हालै सम्पन्न निर्माण व्यवसायी संघ मकवानपुरको निर्वाचनमा श्रेष्ठ सर्वसम्मत कोषाध्यक्षमा निर्वाचित हुनुभएको थियो भने जोशी र मगर कार्यसमिति सदस्यमा निर्वाचित हुनुभएको थियो । सम्मान कार्यक्रमका संयोजक राजेन्द्र सापकोटाको अध्यक्षता तथा समृद्ध समाज दैनिकका सम्पादक एवम् मकवानपुर बहुमुखी क्याम्पसका सहायक प्राध्यापक सुरेश श्रेष्ठको प्रमुख आतिथ्यमा भएको सम्मान कार्यक्रममा समूहका अध्यक्ष शिवनारायण श्रेष्ठको पनि उपस्थिति रहेको थियो ।
सम्मान कार्यक्रमलाई सम्बोधन गर्नुहुँदै प्रमुख अतिथि श्रेष्ठले सचेत युवाहरुको समूहले जिल्लाका सबै क्षेत्रमा उपस्थिति बढाउँदै लगेको उल्लेख गर्नुभयो । सचेत नागरिक युवा समूहमा आवद्ध युवाको बढ्दो उपस्थितिसँगै समूहको नेतृत्व र सदस्यले थप सतर्कता अपनाउन पनि आवश्यक भएको उहाँले स्पष्ट पार्नुभयो । सचेत नागरिक युवा समूह प्रभावशाली बन्दै जाँदा जिल्लास्थित सरकारी तथा गैरसरकारी समुदायले समूहको भूमिका र सरोकारलाई ध्यान दिने अवस्था रहेको श्रेष्ठको भनाइ थियो । प्रमुख अतिथि श्रेष्ठले संघमा निर्वाचित तीनैजनाई एक एक थान पुस्तक पनि उपहारस्वरुप प्रदान गर्नुभएको थियो ।
