हेटौंडाः मकवानपुर जिल्लास्तरीय पुरुष शिक्षक दौड तथा महिला शिक्षक स्लो स्कुटी रेस प्रतियोगिता भएको छ । हेटौंडा उपमहानगरपालिका वडा नम्बर ४ को प्रायोजन तथा नेपाल राष्ट्रिय शिक्षक संगठन मकवानपुरको आयोजनामा आज सोमबार प्रतियोगिता भएको हो ।
प्रतियोगिता अन्तर्गत पुरुष शिक्षक दौडतर्फ भानु माविका मुकेश चौलागाई र महिला शिक्षक स्लो स्कुटी रेसतर्फ भृकुटी माविकी सिर्जना थिङ प्रथम हुनुभएको छ । पुरुष शिक्षक दौडतर्फ तासिर बोर्डिङ स्कुलका सन्दीप बस्नेत द्वितीय, श्री प्राविका विश्व लामा तृतीय र बाघभैरव माविका बलराम राई चौंथो भएका छन् । प्रथम, द्वितीय, तृतीय र चौथो हुनेले क्रमशः ६ हजार, ५ हजार, ३ हजार र २ हजार रुपैयाँ प्राप्त गरेका छन् । शिक्षक दौडमा करिब ६० जनाको सहभागिता रहेको थियो । हेटौंडाको कान्तिराज पथ–भैरव रोड हुँदै हुप्रचौरसम्म करिब ३ किलोमिटर दुरी दौडमा शिक्षकहरुले प्रतिस्पर्धा गरेका थिए ।
यस्तै, महिला शिक्षक स्लो स्कुटी रेस प्रतियोगितातर्फ तासिर बोर्डिङ स्कुलकी एन्जिला रिजाल द्वितीय र आधुनिक राष्ट्रिय माविकी देवमाया पाठक तृतीय हुनुभएको छ । स्लो स्कुटी रेस प्रतियोगितामा ४० जना महिला शिक्षकहरुको सहभागिता रहेको थियो । महिला शिक्षक स्लो स्कुटी रेस प्रतियोगितातर्फ प्रथम, द्वितीय र तृतीय हुनेले क्रमशः ७ हजार, ५ हजार र ३ हजार रुपैयाँ प्राप्त गरेका छन् । हेटौंडा उपमहानगरपालिका वडा नम्बर ४ का वडाध्यक्ष नवीन सिग्देल, नेपाल राष्ट्रिय शिक्षक संगठनकी केन्द्रिय सदस्य लक्ष्मी गजुरेल र मकवानपुरका अध्यक्ष श्रीराम दाहालले पुरस्कार वितरण गर्नुभएको थियो ।
