हेटौंडाः नेपाली कांग्रेस बागमती प्रदेशको संसदीय दलको नेतामा नुवाकोटका बहादुर सिंह लामा निर्वाचित हुनुभएको छ । बुधबार बागमती प्रदेशसभास्थित संसदीय कार्यालयमा संसदीय नेता चयनका लागि भएको निर्वाचनमा इन्द्र बहादुर बानियाँलाई ५ मतले पराजित गर्नुहुँदै लामा संसदीय नेतामा चयन हुनुभएको हो ।
पार्टीका केन्द्रीय सदस्य समेत रहनुभएका लामाले २१ मत पाउनुभयो । पार्टी प्रदेश सभापति ईन्द्र बहादुर बानियाँले १६ मत पाउनुभयो । लामा नुवाकोट निर्वाचन क्षेत्र नम्बर २ को २ बाट र बानियाँ मकवानपुर निर्वाचन क्षेत्र नम्बर २ को २ बाट प्रदेशसभामा निर्वाचित हुनुभएको हो । काँग्रेस प्रदेश संसदीय दलको नेता चयनका लागि ३७ जना प्रदेश सभा सदस्यहरुले मतदान गरेका थिए ।
बहादुर सिंह लामाको प्रस्तावकमा प्रदेशसभा सदस्य कुन्दनराज काफ्ले र समर्थकमा उर्मिला नेपाल, तीर्थबहादुर लामा, रमेशकुमार महत र रामकृष्ण चित्रकार रहनुभएको थियो । अर्का उम्मेदवार बानियाँको प्रस्तावकमा प्रभात तामाङ र समर्थकमा छिरिङ दोर्जे लामा रहनुभएको थियो । संसदीय दलको नेताको निर्वाचनका लागि कांग्रेस बागमती प्रदेश उपसभापति चन्द्र महर्जनको संयोजकत्वमा निर्वाचन समिति गठन गरी चुनाव गरिएको थियो ।
