हेटौंडाः मकवानपुरको बकैया गाउँपालिकामा स्कुटरको ठक्करबाट गम्भीर घाइते भएका एक जना पैदलयात्री वृद्धको मृत्यु भएको छ । सोमबार साँझ ७ बजेर ४५ मिनेटको समयमा बकैया–४ भिमसेनदमार स्थित धरान चतरा सडक खण्डमा हात्तिसुडेंबाट हेटौंडातर्फ जाँदै गरेको ना ३७ प १०५० नम्बरको स्कुटरले ठक्कर दिँदा घाइते भएका बकैया–३ हात्तिसुडें बस्ने ८० वर्षीय नानी लाल न्यासुरको बिहीबार उपचारको क्रममा मृत्यु भएको जिल्ला प्रहरी कार्यालय मकवानपुरका प्रहरी प्रवक्ता टेक बहादुर कार्कीले जानकारी दिनुभयो ।
घाइते न्यासुरको उपचारको क्रममा बिहीबार ५ बजेर ५० मिनेटको समयमा चुरेहिल अस्पताल हेटौंडामा मृत्यु भएको प्रवक्ता कार्कीले बताउनुभयो । न्यासुरलाई स्कुटरले ठक्कर दिई दुर्घटना भएको भन्ने खबर प्राप्त हुन साथ प्रहरी चौकी हात्तिसुडेंबाट प्रहरी खटिएको थियो । स्कुटरको ठक्करबाट टाउकोमा चोट लागी घाइते भएका न्यासुरको स्थानीय क्लिनिकमा सामान्य उपचारपश्चात् थप उपचारको लागी चुरेहिल अस्पतालमा ल्याइएको थियो । स्कुटर र स्कुटर चालक अहिले प्रहरी चौकी हातिसुडेंको नियन्त्रणमा रहेको जनाइएको छ । शव हेटौंडा अस्पताल ल्याउने तयारी भइरहेको प्रहरीले जनाएको छ ।
