हेटौंडाः नेपाल प्रेस युनियनको शुक्रबार हेटौंडामा सुरु भएको राष्ट्रिय महाधिवेशनलाई सम्बोधन गर्दै नेपाली कांग्रेसका महामन्त्री गगन थापाले प्रेस युनियनकर्मीलाई सही सूचना सम्प्रेषण गर्न आग्रह गर्नुभएको छ । उहाँका अनुसार पत्रकारले सत्य, तथ्य समाचार सम्प्रेषण गरेन भने जनतामा भ्रम फैलिएर सर्वसाधारणलाई उत्तेजित र आक्रोशित बनाउँछ ।
उहाँले भन्नुभयो, “पत्रकारसँग सरकारको पनि अपेक्षा रहेको छ । सरकारले गरेको काम र छलफलमा भएका विषयहरु सही ढंगबाट पत्रकारले सूचना सम्प्रेषण गर्नुपर्छ । जनताले समयमा नै सत्य, तथ्य सूचना प्राप्त गर्न पाउनुपर्छ ।” राजनीतिक विचारसँग जोडिएको भएर प्रेस युनियनकर्मीहरुलाई समय समयमा दोहोरो भूमिका निर्वाह गर्नुपरेको उहाँको भनाई छ । राजनीतिक विचारसँगै खरो रुपमा संचारकर्मीको धर्म निर्वाह गरिरहेकोमा उहाँले प्रेस युनियनका पत्रकारहरुको प्रशंसा गर्नुभयो । युनियनकर्मीहरुले लोकतन्त्र प्रतिको आस्थासँगै संचारकर्मीको धर्म पनि निर्वाह गरिरहेको उहाँको भनाई छ ।
