हेटौंडाः कप्तान विपुल खनालको अर्धशतकमा मकवानपुरको यु–१९ क्रिकेट टिमले भक्तपुरलाई पराजित गरेको छ । काठमाडौंको मुलपानी क्रिकेट मैदानमा जारी वाईवाई यु–१९ क्रिकेट बागमती प्रदेशको छनोट प्रतियोगिताअन्तर्गत् मंगलबार भएको समूह चरणको अन्तिम खेलमा मकवानपुरले भक्तपुरलाई १ विकेटले पराजित गरेको हो ।
समूह चरणअन्तर्गत्को अन्तिम खेलमा भक्तपुरले दिएको १ सय १८ रनको विजयी लक्ष्य मकवानपुरले २४ ओभरमा ९ विकेट गुमाउँदै पूरा गर्यो । खेलको म्यान अफ दि म्याचसमेत घोषित भएका कप्तान विपुलले अविजीत रहँदै ५१ बलमा ५३ रन बनाए । खेलमा भक्तपुरका सक्रिय राजले सर्वाधिक ३ विकेट लिए ।
यसअघि पहिले ब्याटिङ गरेको भक्तपुरले निर्धारित ३५ ओभरको खेलमा ३१ ओभरमा अलआउट हुँदै १ सय १७ रन बनाएको थियो । भक्तपुरका लागि निश्चल थापाले सर्वाधिक ३४ रन बनाएका थिए । मकवानपुरका कुशल केसीले ४ विकेट लिएका थिए भने कप्तान विपुलले ३ विकेट लिएका थिए ।
समूह चरणको अन्तिम खेलमा जीत हासिल गरेपनि मकवानपुरको यु–१९ क्रिकेट टिम प्रतियोगिताबाट बाहिरिएको छ । समूह चरणको २ खेलमध्ये पहिलो खेलमा पराजित भएको मकवानपुर रनरेटका आधारमा सेमिफाइनल प्रवेश गर्नबाट रोकिएको हो । पहिलो खेलमा नुवाकोटसँग ६ विकेटले पराजित भएको मकवानपुर सेमिफाइनल प्रवेश गर्न भक्तपुरसँगको खेल ठूलो अन्तरले जित्नुपर्ने दबाबमा रहेको थियो ।
बागमती प्रदेशका ६ वटा जिल्लाको टिमको सहभागिता रहेको प्रतियोगितामा मकवानपुर बाहिरिँदा नुवाकोट समूह विजेता र भक्तपुर उपविजेता बन्दै सेमिफाइनल प्रवेश गरेको छ । यसैगरी अर्को समूहबाट काठमाडौं बाहिरिएको छ भने चितवन समूह विजेता र ललितपुर उपविजेता बन्दै सेमिफाइनल छिरेको छ ।
