हेटौंडाः नेपाल इङ्लिस ल्याङ्ग्वेज टिचर्स एसोसिएसन (नेल्टा) बागमती प्रदेशको आयोजनामा शनिबारबाट अंग्रेजी विषय शिक्षकहरुका लागि अनलाइन तालिम सुरु भएको छ । तालिममा नेल्टाका जिल्ला, प्रदेश र केन्द्रीय पदाधिकारी, आजीवन सदस्य तथा विभिन्न तहमा अध्यापन गर्ने करिब २ सय ५० जना अंग्रेजी शिक्षक सहभागी भएका छन् ।
नेल्टा बागमती प्रदेशका अध्यक्ष गणेश हुमागाईंको सभाध्यक्षता रहेको तालिम उद्घाटन कार्यक्रममा नेल्टाका केन्द्रीय अध्यक्ष मोतीकला सुब्बा देवानको प्रमुख आतिथ्यता रहेको थियो । कार्यक्रममा नेल्टा केन्द्रीय समिति तथा प्रदेश समितिका पधाधिकारी एवम् सदस्यहरु, नेल्टा सेन्टरका प्रोग्राम कोअर्डिनेटर, एक्सेस प्रोग्राम कोअर्डिनेटरलगायत विभिन्न जिल्लाका अध्यक्षहरुको आतिथ्यता रहेको थियो । कार्यक्रमको सञ्चालन नेल्टा बागमती प्रदेशका महासचिव किशोर पराजुलीले गर्नुभएको थियो ।
तालिम कार्यक्रममा पाठ्यक्रम विकास केन्द्रका पाठ्यक्रम अधिकृत शंकर अधिकारी, नेल्टाका वरिष्ठ उपाध्यक्ष प्रा. डा. लक्ष्मण ज्ञवाली, अंग्रेजी पाठ्यपुस्तक लेखक विश्वराज जोशी, नेल्टा केन्द्रका पूर्वतालिम संयोजक सरिता देवानलगायतले सहजीकरण गर्नुहुनेछ ।
अहिलेको विषम परिस्थितिको समयलाई सदुपयोग गर्दै नेल्टा बागमती प्रदेशले आयोजना गरेको यो कार्यक्रममा विभिन्न तहमा अध्यापन गर्ने अंग्रेजी शिक्षकहरुको पेशागत विकासको लागि हरेक शनिबार बिहान ७ः३० देखि ९ बजेसम्म यो तालिम सञ्चालन हुने जनाइएको छ । सम्बन्धित विषयमा उच्च दक्षता हासिल गरेका राष्ट्रिय एवम् अन्तर्राष्ट्रिय प्रशिक्षकहरुले प्रशिक्षण दिने तालिम अंग्रेजी अध्यापन गर्ने शिक्षकहरुका लागि धेरै नै उपयोगी हुने तालिमका सहभागीहरुको विश्वास छ ।
विषम परिस्थितिको समयलाई सदुपयोग गरी शिक्षकहरुका लागि अत्यन्तै उपयोगी अनलाइन तालिम सुरु गरी सो तालिममा भाग लिने अवसर प्रदान गरेकोमा सहभागीहरुले नेल्टा बागमती प्रदेशलाई धन्यवाद दिएका छन् । तालिमलाई अत्यन्त व्यवस्थित, मर्यादित र प्रभावकारी ढंगबाट सञ्चालन गर्न प्रत्यक्ष वा अप्रत्यक्षरुपमा सहयोग पुर्याउनुहुने सम्पूर्ण महानुभावहरुलाई आयोजकले धन्यबाद दिएको छ ।
