हेटौंडाः पूर्व–पश्चिम राजमार्गअन्तर्गत हेटौंडा–१५, रातोमाटेमा बुधबार ट्रक दुर्घटना भई मृत्यु भएका चालक र सहचालकको पहिचान खुलेको छ ।
बुधबार साँझ ६ बजेको समयमा भएको ट्रक दुर्घटनाबाट मृत्यु हुनेमा ना ५ ख १८६४ नम्बरको ट्रकका चालक २८ वर्षीय अविनाश मिश्र र सहचालक २१ वर्षीय अभय शाह रहेका छन् ।
दुबै जना महोत्तरी जिल्ला जलेश्वर नगरपालिकाका रहेका छन् भने चालक वडा नं. ४ र सहचालक वडा नं. ३ का रहेका जिल्ला प्रहरी कार्यालय मकवानपुरका प्रवक्ता प्रहरी नायव उपरीक्षक जयश्वर रिमालले जानकारी दिनुभयो ।
चालकको हेटौंडास्थित सञ्चो हस्पिटलमा र सहचालकको हेटौंडा अस्पतालमा उपचारको क्रममा मृत्यु भएको थियो । बारा जिल्लाबाट हेटौंडातर्फ आउँदै गरेको ना ५ ख १८६४ नम्बरको ट्रक अनियन्त्रित भई अगाडि गुडिरहेको ना ५ ख ५९६३ नम्बरको ट्रकलाई ठक्कर दिएर पल्टिएको थियो ।
