हेटौंडाः नेकपा (माओवादी केन्द्र) का स्थायी कमिटी सदस्य एवम् पूर्व गृहमन्त्री जनार्दन शर्मा ‘प्रभाकर’ले पार्टीलाई केन्द्रसँगै गाउँ तहबाट शुद्धीकरण गरी बलियो कम्यूनिष्ट पार्टी बनाउने बताउनुभएको छ । माओवादी केन्द्र मकवानपुरका नेता–कार्यकर्तासँग शुक्रबार हेटौंडास्थित पार्टी कार्यालयमा भेटघाट गर्नुहुँदै उहाँले राष्ट्र, राष्ट्रियता, स्वाधिनता र आत्मनिर्णयको अधिकारको पक्षमा सशक्त रुपमा अघि बढ्नुको विकल्प नभएकोमा जोड दिनुभयो ।
‘नेपालमा कम्यूनिष्ट आन्दोलन अहिले गम्भीर अवस्थामा पुगेको छ,’ उहाँले भन्नुभयो, ‘राष्ट्र र स्वाधिनतामाथि हमला भएकाले राष्ट्रवादी कम्यूनिष्टहरु गाउँगाउँबाट उठ्नुपर्ने बेला आएको छ ।’ पूर्ण–समानुपातिक निर्वाचन प्रणाली, प्रत्यक्ष कार्यकारी राष्ट्र प्रमुख र पहिचानसहितको नेपाल निर्माण अहिलेको प्रमुख माग रहेको भन्नुहुँदै उहाँले त्यसका लागि माओवादी केन्द्रले नेतृत्वदायी र जुझारु भूमिका खेल्नुपर्ने बताउनुभयो ।
पुँजीजीवादमा निर्भर हुँदा नेपालमा गरिब झन् गरिब र धनी झन् धनी बन्दै गएको भन्नुहुँदै उहाँले राज्यले बजारको अनुगमन मात्र गर्दा जनता धेरै मारमा परेको बताउनुभयो । ‘विश्वभर पूर्णपुँजीवादी व्यवस्था असफल भइसकेको छ,’ शर्माले भन्नुभयो, ‘राज्य नियन्त्रित पुँजीवाद अर्थात् समाजवाद आवश्यक भइसकेको छ ।’
नेपालमा समाजवाद प्राप्त गर्न नेतृत्व गर्ने पार्टी आवश्यक भएको भन्नुहुँदै त्यसका लागि माओवादी केन्द्रलाई उत्पादनसँग जोडिएको पार्टी बनाउनुपर्नेमा स्थायी कमिटी सदस्य प्रभाकरले जोड दिनुभयो । पार्टीका सबै कमिटी आन्तरिक जनवाद (लोकतन्त्र) मुलक बनाउनुपर्ने भन्नुहुँदै सबै नेता, कार्यकर्ता गम्भीर भई गाउँगाउँमा संगठन विस्तारमा तत्काल लाग्न उहाँले आग्रह गर्नुभयो ।
माओवादी केन्द्रलाई गरिब, विपन्न, उत्पीडित वर्गको पार्टी बनाउन देशभर २० लाख घर, परिवारलाई पार्टीमा संगठित गर्नुपर्ने भन्नुहुँदै उहाँले पार्टीले एकता अभियानलाई सँगसँगै लगेर देश र जनताका पक्षमा काम गर्ने बताउनुभयो । संघीयता, समावेशी र धर्म निरपेक्षता स्वीकारेर आएकाले एमालेसँग सहकार्य गरेपनि धोका भएको शर्माले जिकिर गर्नुभयो । सर्वोच्च अदालतले नेपाल कम्यूनिष्ट पार्टी (नेकपा) फुटाउने फैसला गरेर आत्मनिर्णयको अधिकार हनन् गरेको भन्नुहुँदै शक्ति केन्द्रहरूका कारण अदालतले त्यस्तो गरेको आरोप पनि लगाउनुभयो ।
कार्यक्रममा नेकपा (माओवादी केन्द्र)का मकवानपुर ईन्चार्ज कुमारी मोक्तान, जिल्ला अध्यक्ष प्रदेश सांसद प्रेमबहादुर पुलामी, नेताहरु ओम ग्लान, सर्केश घलान, वीरबहादुर घलान ‘ज्वाला’, कमानसिं पाख्रिन, प्रकाश पाण्डे, विवेक राई, बालकृष्ण चौलागाई, सुमन पाख्रिन, रामहरी सुवेदी लगायतको सहभागिता रहेको थियो ।
