हेटौंडाः हेटौँडामा जारी स्थानीय तह सहिद स्मृति गोल्डकप अन्तराष्ट्रिय फुटबल प्रतियोगिताको सेमिफाइनलमा मच्छिन्द्र क्लब प्रवेश गरेको छ । सोमबार संकटा क्लबलाई १–० गोलले पराजित गर्दै मच्छिन्द्र सेमिफाइनल प्रवेश गरेको हो ।
खेलमा मच्छिन्द्रका राजेश परियारले गरेको एक गोल नै निर्णायक बन्यो । म्यान अफ दी म्याच घोषित हुँदै उनले नगद दश हजार रुपैयाँ प्राप्त गरे । मकवानपुरको ईन्द्रसरोवर गाउँपालिकाका अध्यक्ष जिवन लामाले म्यान अफ दी म्याचको पुरस्कार प्रदान गरेका हुन् ।
हारसँगै संकटा क्लब प्रतियोगिताबाट बाहिरिएको छ । क्लबको हारसँगै टिम म्यानेजर राजेश तुलाधरले खेलाडीहरुले मैदान भित्र आफ्नै ढंगले खेल खेल्दा हार बेर्होनुपरेको प्रतिक्रिया दिए । उनले सोमबारको खेल दुवै टिमको बराबरी भएपनि गोल गर्न नसकेको बताए । विदेशी खेलाडीले पनि राम्रो खेल्न नसकेको उनको भनाई छ ।
यस्तै विजेता मच्छिन्द्रका टिम प्रशिक्षक प्रवेश कटुवालले खेल जित्दा आफु सन्तृष्ट रहेको बताए । अन्य खेलाडीहरु अरु खेलमा व्यस्त हुँदा छोटो समयमा अहिलेको टिम राम्रो बनेकोे बताए । उनले आगामी खेलमा केही खेलाडीहरु थप गर्ने जानकारी दिए ।
हेटौंडामा जारी स्थानीय तह सहिद स्मृति गोल्डकप फुटबल प्रतियोगितमा मच्छिन्द्रको जितसँगै ३ वटा टिम सेमिफाइनल प्रवेश गरेको छ । मकवानपुर–११, नेपाली आर्मी क्लब यसअघि नै सेमिफाइनल प्रवेश गरिसकेका छन् ।
अब मंगलबार अन्तराष्ट्रिय क्लब अफ्रिकन रुट्स एसोसिएसन (अरास) र बागमती युवा क्लब सर्लाहीबिच सेमिफाइनल प्रवेश गर्न प्रतिस्पर्धा हुने भएको छ । प्रतियोगितामा चैत्र ४ गतेबाट सेमिफाइनल खेल सुरु हुनेछ भने चैत्र ७ गते फाइनल खेल हुनेछ ।
