हेटौंडाः मोटरसाइकल चोरी गर्ने गिरोहका ३ जनालाई मकवानपुर प्रहरीले पक्राउ गरेको छ । चोरी भएको मोटरसाइकलसहित सर्लाही जिल्लाको बागमती नगरपालिका–१२ का २० वर्षीय टेक बहादुर गोले, सर्लाही जिल्लाकै लालबन्दी नगरपालिका–१४ का २७ वर्षीय जनक तामाङ र सिन्धुली जिल्लाको मरिण गाउँपालिका–८ का २० वर्षीय निकेस वाईबालाई मकवानपुर प्रहरीले पक्राउ गरेको जनाएको छ ।
हेटौंडा–१५, रातोमाटेका २५ वर्षीय शेरबहादुर पाख्रिनको बागमती प्रदेश ०३–००२ प ०५१६ नम्बरको मोटरसाइकल शुक्रबार हेटौंडा–४ बाट चोरी भएको भनी प्रहरीलाई जानकारी प्राप्त भएलगत्तै प्रहरी परिचालित भई चोरी भएको मोटरसाइकल र मोटरसाइकल चोरीमा संलग्न तीनजनालाई पक्राउ गरिएको जिल्ला प्रहरी कार्यालय मकवानपुरका प्रवक्ता प्रहरी नायव उपरीक्षक ईन्द्रबहादुर रानाले जानकारी दिनुभएको छ ।
इलाका प्रहरी कार्यालय पशुपतिनगरबाट खटिएको प्रहरीले रातोमाटे क्षेत्रबाटै पक्राउ गरेको हो । मोटरसाइकल चोरीमा संलग्न सिन्धुली जिल्लाको मरिण घर बताउने सुरज तामाङको खोजी कार्य भइरहेको पनि प्रहरीले जनाएको छ । चोरी भएको मोटरसाइकलसहित पक्राउ परेकाहरुविरुद्ध आइतबार मुद्दा दर्ता गरिएको प्रहरीले जनाएको छ ।
