हेटौंडाः शैक्षिक क्षेत्रमा योगदान गर्ने उद्देश्यका साथ मकवानपुरमा स्थापना भएको शैक्षिक सहयोग अक्षय कोषको साधारणसभा आज शुक्रबार हुने भएको छ । अक्षय कोषका अध्यक्ष एवम् जिल्ला समन्वय समिति मकवानपुरका प्रमुख रघुनाथ खुलालको अध्यक्षतामा बिहीबार बसेको बैठकले कोषको दोस्रो साधारण सभा आयोजना गर्ने निर्णय गरेको हो ।
शुक्रबार दिउँसो २ बजे सिद्धार्थ माविको सभा हलमा साधारण सभा आयोजना गर्ने निर्णय भएको अध्यक्ष खुलालले बताउनुभयो । गत वर्ष भदौ महिनाबाट सुरु भएको कोषमा हालसम्म ७ संस्थागत, ६ जना विशिष्ट, ६१ आजीवन, १ जना पारिवारिक र १८ जना साधारण सदस्य गरी ९३ जना आवद्ध हुनुभएको छ । संस्थामा हालसम्म सदस्यता वापत १० लाख ४५ हजार ६६८ रुपैयाँ जम्मा भएको उहाँले बताउनुभयो ।
संस्थाले यसै वर्षबाट जिल्लामा छात्रवृत्ति वितरण गर्ने योजना बनाएको समेत उहाँले बताउनुभयो । छात्रवृत्ति वितरणका लागि कार्यविधि तयार भएको र सोहि अनुसार कार्य अगाडि बढाइने उहाँले बताउनुभयो । बैठकमा संस्थाकी उपाध्यक्ष ईन्दिरा न्यौपाने, सचिव बद्री पाठक, कोषाध्यक्ष रामकृष्ण थापालगायत सदस्यहरुको उपस्थिती थियो ।
