हेटौंडाः मकवानपुरको थाहा नगरमा जारी थाहा गोल्डकपमा शनिबार चार खेल भएका छन् । चार खेल मध्ये दुई खेल निर्धारित समयमा बराबरीमा सकिएपछि टाइब्रेकर धकेलिएको थियो । एफसी डाँडाबासले बलामी युवा समूहलाई र ऋषेश्वर एफसी ११ ले ल्ह्याम पुचः लाई टाइब्रेकरमा पराजित गरेको हो ।
टाइब्रेकरमा एफसी डाँडाबासले बलामी युवा समुहलाई ३–२ गोलअन्तरले पराजित गर्यो । यस्तै ऋषेश्वर एफसी ११ ले ल्ह्याम पुचः लाई टाइब्रेकरमा ३–१ गोलअन्तरले पराजित गर्यो । शनिबार नै भएको खेलमा ईन्द्रसरोवर गाउँपालिकाको टिमले भुटनदेवी युवा क्लब हेटौंडालाई १–० गोलअन्तरले पराजित गरेको छ भने ग्याङस्टारले प्रगतिशील युवा क्लबलाई १–० गोलअन्तरले पराजित गरेको छ । शनिबार जीत निकाल्ने चारवटै टिम अन्तिम ८ मा प्रवेश गरेको छ । प्रतियोगितामा प्रथम पुरस्कार १ लाख रुपैयाँ, द्वितीय पुरस्कार ५० हजार रुपैयाँ रहेको छ । थाहा नगरपालिकाको आर्थिक सहयोगमा एफसी डाँडाबासको आयोजनामा थाहा गोल्डकप भइरहेको छ ।
