हेटौंडाः मनहरी गाउँपालिकामा जारी अध्यक्ष कप फुटबल प्रतियोगताको सेमिफाइनल समीकरण पूरा भएको छ । गाउँपालिकाका ९ वटै वडाबीच भएको फुटबल खेलबाट सेमिफाइनलमा पुग्ने चार टिमको टुंगो लागेको हो । प्रतियोगितामा वडा नम्बर २, ३, ४ र ७ का टिमहरुबीच सेमिफाइनल खेल हुने भएको छ । मंगलबार भएको खेलमा वडा नम्बर ४ ले वडा नम्बर १ लाई १-० गोलअन्तरले पराजित गरेर सेमिफाइनल प्रवेश गरेसँगै सेमिफाइनल समीकरण पूरा भएको हो ।
मंगलबार भएको खेलमा वडा नम्बर ४ का उज्ववल बिष्टले पेनाल्टीमा १ गोल गरेर आफ्नो टिमलाई विजयी गराएका थिए । सेमिफाइल खेल बुधबारबाट सुरु हुने मनहरी गाउँपालिकाको खेलकुद विकास समिति अध्यक्ष नवीन सुवेदीले जानकारी दिनुभएको छ । शनिबारबाट सुरु भएको तेस्रो अध्यक्ष कप फुटबल प्रतियोगितामा विजेताले १ लाख रुपैयाँ तथा उपविजेताले ५० हजार रुपैयाँसहित शिल्ड तथा मेडल प्राप्त गर्नेछन् ।
