हेटौंडाः बारा जिल्लाको सिमरामा जारी भेट्रान्स फुटबल प्रतियोगिता अन्तर्गत बुधबार भएको खेलमा हेटौंडाको हेटौंडा फुटसल भेट्रान्स विजयी भएको छ । हेटौंडा फुटसल भेट्रान्सले जैतापुर भेट्रान्सलाई ५–० गोलअन्तरले पराजित गर्दै समिफाइनल प्रवेश गरेको छ ।
हेटौंडा फुटसल भेट्रान्सका लागि सुरज गुरुङले ३ गोल गर्दै ह्याट्रिक पूरा गरे भने प्रशान्त पाख्रिनले २ गोल गरे । फराकिलो गोलअन्तरले विजयी हुँदै हेटौंडा फुटसल भेट्रान्स सेमीफाइनल चरणमा प्रवेश गरेको मकवानपुर जिल्ला फुटबल संघका महासचिव युनाल मल्लले जानकारी दिनुभएको छ । हेटौंडा फुटसल भेट्रान्सले बिहीबार हुने सेमीफाइनल खेलमा डुमारवाना भेट्रान्सको सामना गर्ने मल्लले बताउनुभयो ।
विभिन्न जिल्लाका १२ वटा टिम सहभागी प्रतियोगितामा हेटौंडाबाट मकवानपुर भेट्रान्स क्लब र हेटौंडा फुटसल भेट्रान्स गरी २ वटा टिम सहभागी रहेको थियो । प्रतियोगितामा प्रथम हुने टिमले नगद ३० हजारसहित शिल्ड, मेडल र प्रमाणपत्र प्राप्त गर्नेछ भने दोस्रो हुने टिमले नगद २० हजारसहित शिल्ड, मेडल र प्रमाणपत्र प्राप्त गर्ने आयोजकले बताएको छ ।
