हेटौंडाः मकवानपुर प्रहरीले लागुऔषधसहित दुईजनालाई पक्राउ गरेको छ । पूर्वपश्चिम राजमार्गअन्तर्गत हेटौंडा–१५, रातोमाटेस्थित प्रहरी चेकपोष्टबाट बिहीबार साँझ र शुक्रबार बिहान गरी दुईजनालाई पक्राउ गरेको जनाएको छ ।
बिहीबार साँझ साढे ७ बजे जनकपुरबाट नेपालगञ्जतर्फ जाँदै गरेको ना ५ ख ७२२६ नम्बरको बसमा सुरक्षाजाँच गर्दा रौतहट जिल्लाको चन्द्रपुर–२ बस्ने २१ वर्षीय दुधराज पाख्रिनको साथबाट लागूऔषध नाईट्रोभेट ६ सय एम्पुलसहित प्रहरीले नियन्त्रणमा लिएको जनाएको छ ।
यस्तै शुक्रबार बिहान ९ बजेर २५ मिनेटको समयमा बारा जिल्लाका २८ वर्षीय सतिशकुमार चौधरीलाई १५३ एम्पुल नाईट्रोभेटसहित पक्राउ गरेको हो । ना १ ज ५६५७ नम्बरको सुमोका यात्रु चौधरीलाई प्रहरीले सुरक्षाजाँच गर्ने क्रममा लागुऔषधसहित नियन्त्रणमा लिएको हो ।
