हेटौंडाः मकवानपुरको बकैया गाउँपालिका–६, गडुवानमा शुक्रबार मृत भेटिएका बालकको हत्या आशंकामा प्रहरीले अनुसन्धान थालेको छ । प्रहरीले हत्या भएको आशंकामा मृतक बालकका फुपुका छोरासहित दुईजनालाई शुक्रबारै नियन्त्रणमा लिएको छ ।
भदौ १३ गतेदेखि हराइरहेका ९ वर्षीय मनिष भोलनको शव शुक्रबार बिहान गडुवान खोला छेउको झाडीमा फेला परेको थियो । बालकको शवको अवस्था हेर्दा हत्या भएको हुन सक्ने आशंकामा प्रहरीले अनुसन्धान लागेको जिल्ला प्रहरी कार्यालय मकवानपुरका प्रवक्ता प्रहरी नायव उपरीक्षक ईन्द्रबहादुर रानाले जानकारी दिनुभएको छ । प्रहरी प्रवक्ता रानाका अनुसार बालकको हत्या भएको आशंकामा मृतक बालकका फुपुका छोरा २७ वर्षीय मंगलसिंह वाईबासहित २९ वर्षीय सुवास वाईबालाई पक्राउ गरिएको छ । पक्राउ परेका दुबैजनासँग घटनाबारे सोधपुछ भइरहेको प्रहरीले जनाएको छ ।
