हेटौँडा : संघीय सरकारले प्राथमिकतामा राखेको सवारी चालक अनुमतिपत्रको स्मार्ट कार्ड वितरणको कार्य हेटौँडाबाट पनि वितरण सुरु भएको छ । आज (सोमबार) देखि स्मार्ट लाइसेन्स कार्ड वितरण सुरु गरिएको यातायात व्यवस्था कार्यालय हेटौँडाले जनाएको छ ।
यही बैशाख ४ गतेदेखि १० गतेसम्म ६ दिनको अवधिमा नयाँ सवारी चालक अनुमतिपत्र, वर्ग थप र नवीकरण गरी ३ सय ६५ वटा स्मार्ट कार्ड प्राप्त भएपछि आजबाट वितरण सुरु गरिएको यातायात व्यवस्था कार्यालय हेटौँडाको सवारी चालक अनुमतिपत्र शाखाका प्रमुख राजु अर्यालले जानकारी दिनुभयो ।
यातायात व्यवस्था विभागले हुलाकमार्फत लाइसेन्स कार्यालयलाई पठाएको अर्यालले जानकारी दिनुभयो । यसअघि कार्यालयबाटै कर्मचारी यातायात व्यवस्था विभागसम्म पुग्नु पर्ने बाध्यता थियो । यातायात व्यवस्था कार्यालय हेटौँडाबाट नयाँ लाइसेन्स, नवीकरण र वर्ग थप गरी सन् २०२२ को जुलाईदेखि हालसम्म करिब ६० हजार लाइसेन्स प्रिन्ट हुनुपर्ने छ । पुराना सवारी चालक अनुमतिपत्र पनि क्रमशः प्राप्त भएपछि वितरण गरिने कार्यालयले स्पष्ट पारेको छ ।
सेवाग्राहीलाई स्मार्ट लाइसेन्स कार्ड वितरण गर्नुहुँदै यातायात व्यवस्था कार्यालय हेटौँडाको सवारी चालक अनुमतिपत्र शाखाका प्रमुख राजु अर्याल ।
