हेटौंडाः प्रगतिशील लेखक संघ (प्रलेस) मकवानपुरले आफ्नो कार्यक्रम ‘पाँच कविका पन्ध्र कविता’ को दोश्रो शृङ्खला शुक्रबार भर्चुअल माध्यम जुममार्फत सञ्चालन गरेको छ । इटहरीका टीका आत्रेय र मिश्र बैजयन्ती, मकवानपुरका निमेष निखिल, चितवनका सुमनराज श्रेष्ठ , काठमाडौंका आरएम डङ्गोललाई कवि विशेषको रुपमा प्रस्तुत गरिएको कार्यक्रममा प्रमुख अतिथिका रुपमा प्रलेस केन्द्रका अध्यक्ष प्राडा जीवेन्द्रदेव गिरि रहनुभएको थियो । कार्यक्रममा कविहरूले तीन/तीन ओटा कविताहरू वाचन गर्नुभएको थियो ।
कार्यक्रममा पाँच कविले वाचन गर्नुभएको कविताहरू माथि समीक्षक वासुदेव अधिकारीले समीक्षा गर्नुभएको थियो । प्रस्तुत कविता सशक्त रहेको समीक्षक अधिकारीले बताउनुभयो । कविहरू प्रतिपक्षी हुने नाममा अराजक हुन नहुने पनि समीक्षक अधिकारीले धारणा व्यक्त गर्नुभयो । प्रलेस मकवानपुरका सचिव विशाल अधिकारी ‘आशुतोष’ले सञ्चालन गर्नुभएको कार्यक्रममा साहित्यकार तथा कविहरू सुवास खनाल, देवराज तिवारी, दीपक गौतम, पुरुषोत्तम आचार्य, भावना सापकोटा, रमेशमोहन अधिकारीलगायतको उपस्थिति रहेको थियो । कार्यक्रम प्रलेस अध्यक्ष शान्ति प्रियवन्दनाको सभाध्यक्षतामा भएको थियो ।
