हेटौंडाः मदन भण्डारी फाउण्डेशन मकवानपुरले सञ्चालनमा ल्याएको फुड बैंकलाई आज नेपाल मुस्लिम युवा समाजले खाद्यान्न सहयोग गरेको छ । हेटौंडाको कपुरकम्प्लेक्स अगाडि सञ्चालनमा रहेको फुड बैंकलाई आज एक कार्यक्रमका बीच मस्यौरा ११ बोरा, चिउरा ४ बोरा, तेल ४ काटुन सहयोग गरिएको छ । फुड बैंक व्यवस्थापन समितिका संयोजक उत्तम न्यौपानेलाई नेपाल मुस्लिम युवा समाज मकवानपुरका संयोजक जाबेद हुसेन र सहसंयोजक जब्स हुसेनले खाद्यान्न सामग्री हस्तान्तरण गर्नुभएको छ ।
खाद्यान्न सहयोग हस्तान्तरण कार्यक्रममा नेपाल मुस्लिम युवा समाज मकवानपुरका कोषाध्यक्ष जुनेजु मिया, सचिव सोएम मिया, उपसचिव कोयाम मिया, मदरसाका अध्यक्ष सलिम मिया लगायतको उपस्थिति रहेको नेपाल मुस्लिम युवा समाज मकवानपुरका सहसंयोजक जब्स हुसेनले बताउनु भयो । कोरोना महामारीका कारण दैनिक गुजारा चलाउन नसकेर अप्ठ्यारोमा परेका श्रमजिवी तथा विपन्न परिवारलाई लक्षित गरेर सञ्चालन गरेको फुड बैंक बिहान ७ बजेदेखि ९ बजेसम्म सञ्चालन गरिएको छ । फुड बैंकमा दाल, चामल, नुन, तेल, मसला लगायतका खाद्यान्न सामग्री राखिएको छ ।
