हेटौंडाः रक्तसञ्चार केन्द्र, हेटौंडा शाखाले आज ७५ युनिट रगत चितवनको भरतपुर पठाएको छ । भरतपुरमा रगत अभाव भएपछि आज ७५ युनिट रगत पठाएको रक्तसञ्चार केन्द्र हेटौंडा शाखाका प्रमुख टंक दाहालले जानकारी दिनुभयो ।
त्यसैगरी अहिले विभिन्न जिल्लामा रगतको अभाव भइरहेको अवस्थामा मकवानपुरमा भने हालको लागी रगतको अभाव नभएको दाहालले जानकारी दिनुभयो । मकवानपुरमा विभिन्न संघस्थाको आयोजनामा रक्तदान कार्यक्रमहरु भएका कारण रगतको अभाव नभएको उहाँको भनाई छ ।
उहाँले अहिलेको अवस्थामा रक्तदान गर्दा जिल्लामा खपत नभएको रगत अन्य स्थानहरुमा पठाउने गरेको बताउनुभयो । साथै उहाँले अहिलेको कोरोना महामारीको अवस्थामा देशभरका रक्तसञ्चार केन्द्रहरुमा रगतको मौज्दात कम भएकोले सबैलाई उहाँले रक्तदान गर्न अनुरोध गर्नुभएको छ ।
