हेटौँडाः कान्ति लोकपथमा दुई ट्रक एकापसमा ठोक्किदा एक जना चालक गम्भीर घाइते भएको बागमती प्रदेश प्रहरी कार्यालय हेटौँडाले जनाएको ।
बुधबार राति ११ बजेर ३५ मिनेटको समयमा मकवानपुरगढी गाउँपालिका–१ लेनडाँडा स्थित सडक खण्डमा उक्त दुर्घटना भएको हो । हेटौँडाबाट काठमाडौंतर्फ जाँदै गरेको म प्र ०३–००२ ख ४६४१ नम्बरको सिमेन्ट लोड ट्रक र विपरीत दिशा काठमाडौंबाट हेटौँडातर्फ आउँदै गरेको म प्र ०३–००२ ख ४५०१ नम्बरको खाली ट्रक एकआपसमा ठोकिएको थियो ।
दुर्घटनामा ४६४१ नम्बरको ट्रकका चालक सिन्धुलीको दूधौली नगरपालिका–१४ बस्ने २४ वर्षीय टुल्कु सिंह तामाङ गम्भीर घाइते भएका छन् । घाइते तामाङलाई उपचारका लागि हेटौँडा अस्पताल पठाइएको प्रहरीले जनाएको छ । अर्को ट्रक (४५०१ नम्बर) का चालक बागमती गाउँपालिका–७ बस्ने ४३ वर्षीय बेल कुमार स्याङतानलाई प्रहरीले नियन्त्रणमा लिएको छ ।
