हेटौँडाः ३०४ औँ पृथ्वी जयन्ती तथा राष्ट्रिय एकता दिवसको अवसरमा हेटौँडामा शुभकामना आदानप्रदान कार्यक्रम सम्पन्न भएको छ । द काउन्सिल अफ जेनजी मकवानपुर र स्वतन्त्र युवाहरूको संयुक्त आयोजनामा कार्यक्रम भएकोे हो ।
द काउन्सिल अफ जेनजी मकवानपुरका संयोजक सुगम नेगीको सभाध्यक्षता र हेटौँडा उपमहानगरपालिकाकी नगरप्रमुख मीनाकुमारी लामाको प्रमुख आतिथ्यमा कार्यक्रम भएको थियो । कार्यक्रमलाई सम्बोधन गर्दै नगरप्रमुख लामाले राष्ट्र निर्माण र सामाजिक रूपान्तरणमा युवाहरूको भूमिका अग्रणी हुने बताउनुभयो । उहाँले पृथ्वीनारायण शाहले राष्ट्र निर्माणमा पुर्याएको योगदानको चर्चा गर्दै अब विकास र समृद्धिका लागि युवा शक्तिलाई एकजुट भएर सहकार्य गर्नसमेत आह्वान गर्नुभयो ।
कार्यक्रममा विशिष्ट अतिथि गैरसरकारी संस्था महासंघ मकवानपुरकी अध्यक्ष रमिला सापकोटा र सञ्चारकर्मी रुपक कालीराजको उपस्थिति थियो ।
