हेटौँडाः मकवानपुरको थाहा नगरपालिका–१, कुन्छालमा रहेको सुनौलो माध्यमिक विद्यालयको स्वर्ण महोत्सव बुधबारबाट सुरु भएको छ । बागमती प्रदेशसभा सदस्य एवम् पूर्वमन्त्री कुमारी मोक्तानको प्रमुख आतिथ्य तथा विद्यालय व्यवस्थापन समितिका कार्यवाहक अध्यक्ष प्रमोद गोपालीको सभाध्यक्षता स्वर्ण महोत्सवको उद्घाटन गरिएको हो ।
विद्यालयले बुधबारदेखि शुक्रबारसम्म विविध कार्यक्रम गरेर स्वर्ण जयन्ती महोत्सव मनाउने भएको छ । बुधबार उद्घाटनको क्रममा विद्यार्थी, अभिभावक र समुदायका मानिसहरूले मौलिक झाँकी प्रदर्शनी गरेको विद्यालयका पूर्वप्रधानाध्यापक कृष्णप्रसाद लामिछानेले जानकारी दिनुभयो ।
स्वर्ण महोत्सवको अवसरमा नगरस्तरीय छात्रा भलिबल प्रतियोगिताको उद्घाटन भएको छ । भलिबल प्रतियोगितामा थाहा नगरपालिकाका ९ वटा विद्यालयको सहभागिता रहेको छ । भलिबल प्रतियोगितामा प्रथम, द्वितीय र तृतीय हुनेले क्रमशः २० हजार, १५ हजार र १० हजार रूपैयाँसहित शिल्ड, मेडल तथा प्रमाणपत्र प्राप्त गर्नेछन् । प्रतियोगिताको फाइनल खेल शुक्रबार हुनेछ ।
उद्घाटन समारोहमा जिल्ला समन्वय समिति मकवानपुरका प्रमुख ललितबहादुर घलान, थाहा नगरपालिका अध्यक्ष विष्णुबहादुर बिष्ट र उपाध्यक्ष भरत गोपालीको विशिष्ट आतिथ्य रहेको थियो । साथै, विभिन्न राजनीतिक दलका प्रतिनिधि, विद्यालयका प्रधानाध्यापक, शिक्षक, अभिभावक, विद्यार्थीलगायतको उपस्थिति रहेको थियो ।
स्वर्ण महोत्सवमा बिहीबार विघटित प्रतिनिधिसभा सदस्य महेश बर्तौलाको प्रमुख आतिथ्य रहनेछ । विद्यालयले बिहीबार १२ वटा विद्यालयको सहभागितामा नगरस्तरीय हाजिरीजवाफ प्रतियोगिता सञ्चालन गर्नेछ । प्रतियोगितामा प्रथम, द्वितीय र तृतीय हुनेले क्रमशः ५ हजार, ३ हजार र २ हजार रुपैयाँसहित प्रमाणपत्र प्राप्त गर्नेछन् । नगरस्तरीय नृत्य प्रतियोगिता, अभिभावकहरूलाई म्युजिकल चेयर र घैँटो फुटाई कार्यक्रमको आयोजना गरेको छ । भलिबल प्रतियोगिताका खेलहरू पनि सञ्चालन हुनेछन् ।
