मकवानपुर जिल्लाका कोभिड–१९ का विरामीको उपचारका लागि हेटौंडा–४, कर्रास्थित श्रमिक माविको भवनमा भएको एउटा मात्र आइसोलेसन अपुग भएपछि हेटौंडा–६, गौरिटारमा पनि सुरु भएको छ । खेलाडी छात्रावासका लागि बनाइएको भए पनि लामो समयदेखि सञ्चालन विहीन अवस्थामा रहेको भवन कोभिड सङ्क्रमितको उपचारका लागि आइसोलेसनका रुपमा प्रयोग हुन थालेको हो । विद्यालयमा भन्दा प्रयोगविहिन भएको सरकारी भवनको उपयोग स्वभाविक हो । तर लामो समयदेखि प्रयोग नभएको भवन आइसोलेसनका लागि कति उपयुक्त छ भन्ने परीक्षण गरिनु पर्ने हुन्थ्यो । त्यसैले बागमती प्रदेशका मुख्यमन्त्री, सामाजिक विकास मन्त्रीदेखि हेटौंडा उपमहानगरपालिकाका मेयरसम्मले पटक–पटक भवनको निरीक्षण गरेका थिए । चैत्रदेखि निरीक्षण गरिएको भवनमा भदौ लागेपछि मात्र आइसोलेसन सुरु भएको छ ।
खेलाडी छात्रावासका लागि बन्दै गरेको भवनमा आइसोलेसन वार्ड उपयुक्त छ छैन भन्ने कुरा प्राविधिक पक्ष हो । विरामीका लागि आवश्यक पर्ने भौतिक पूर्वाधार छन् छैनन् भन्ने कुरा महत्वपूर्ण पक्ष हो । भवनमा धारा, पानी, शौचालय लगायतको आवश्यक व्यस्था भए नभएको यकिन गर्नु आइसोलेसन व्यवस्थापन पक्षको जिम्मेवारी हो । यी सबै पक्षको मूल्याङ्कन गर्नका लागि हेटौंडा अस्पताल विकास समिति, जिल्ला कोभिड–१९ सङ्कट व्यवस्थापन समिति लगायतले पनि अनुगमन गरेकै हो । तर पनि बिरामीका लागि आवश्यक सेवा सुविधामा केही कठिनाई भएका खबरहरु सार्वजनिक भएका छन् । यसले व्यवस्थापकीय पक्षको तयारी माथि प्रश्न उठाइदिएको छ । लामो समयसम्म पनि भवनमा आवश्यक व्यवस्थापन किन भएन ?
कोभिड–१९ को महामारी सुरु भएदेखि नै गौरिटारको छात्रावास प्रयोगमा ल्याउने भनियो तर तयारी नहुँदा अहिले हतारो जस्तो देखिएको छ । छ महिनासम्ममा नयाँ भवन नै बनाउन भ्याउने समय हो । तर निर्माण भइसकेको भवनमा केही अपुग कुराहरुको व्यवस्थापन किन हुन सकेन ? कर्राको आइसोलेसनमा विरामीहरु नअटेपछि मात्र गौरिटारको खेलकुद छात्रावास सरसफाई गर्न थालिएको हो । सरसफाई नसक्दै विरामीहरु राख्दा सेवामा कमजोरी देखिएको छ । समयको चापले तयारी नपुगेको हुँदै होईन यो त सम्बन्धित पक्षको हेलचेक्र्याइँ र बेवास्ता हो । लामो समय हुँदा पनि सङ्क्रमणको आँकलन गर्न नसक्दा अहिले विरामीले सेवा नपाएको विषय निकै चर्चामा छ । छ महिनासम्म छात्रावासलाई तयारी अवस्थामा राख्न नसक्नुको जिम्मेवारी आइसोलेसन व्यवस्थापनले लिनु पर्दछ ।
यस्तै स्थानीयसँग सहकार्यको पनि अभाव देखिएको छ । व्यवस्थापनका लागि स्थानीय तहका जनप्रतिनिधिसँगको सहकार्य जरुरी हुन्छ । खेलाडी छात्रावास हेटौंडा उपमहानगरपालिकाको ६ नम्बर वडामा पर्दछ भने १५ र १६ नम्बर वडाको सिमानामा छ । तर यी तीन वटै वडाका जनप्रतिनिधिहरुलाई कुनै खबर नभएको उनीहरुले सार्वजनिक रुपमै बताइसकेका छन् । स्थानीयले अपनत्व लिन उनीहरुसँग छलफलदेखि संलग्नता आवश्यक हुन्छ । अस्पताल विकास समितिदेखि उपमहानगरपालिका स्थानीयसँगको समन्वयमा कमजोर देखिएको छ । यसले तत्काल आइपर्ने समस्या समाधानमा उनीहरुको सक्रियताको खाँचो देखिएको हो । काम गर्दा कमजोरी हुन्छन् त्यसलाई सुधार गर्दै अगाडि नबढ्ने हो भने विश्वव्यापी महामारीबाट केही पनि अछुतो रहँदैन । त्यसैले कमजोरी सुधार गर्दै नागरिकको जीवनरक्षामा उचित व्यवस्थापन आजको खाँचो हो ।
