हेटौंडाः हेटौंडा–४ स्थित श्रमिक सुरक्षित बचत तथा ऋण सहकारी संस्था लिमिटेडको १७ औँ वार्षिक साधारणसभा सम्पन्न भएको छ । शनिबार संस्थाका अध्यक्ष नवराज अर्यालको सभाध्यक्षतामा साधारणसभा सम्पन्न भएको हो ।
कार्यक्रममा संस्थाका कोषध्यक्ष वीरेन्द्रप्रसाद ढुंगानाले आर्थिक वर्ष २०८१/०८२ को आर्थिक प्रतिवेदन प्रस्तुत गर्नुभयो । यस सहकारीमा १ हजार ९ सय ५८ जना शेयर सदस्यहरु रहेका छन् भने शेयर पुँजी २ करोड ९० लाख ७६ हजार ६ सय रुपैयाँ रहेको छ । संस्थामा गत आर्थिक वर्ष २०८१/०८२ मा १ सय ४ जना शेयर सदस्यले सदस्यता त्याग गर्दा ४० जना नयाँ सदस्यहरु थप भएका छन् ।
संस्थाले गत आर्थिक वर्षमा कुल २६ करोड १५ लाख ३६ हजार ४ सय ८८ रुपैयाँ बराबरको कारेबार गरेको छ । संस्थाको कुल बचत १९ करोड ४२ लाख ९५ हजार ८ सय १२ रुपैयाँ र जगेडा कोषमा १ करोड ७४ लाख ५५ हजार ६ सय १७ रुपैयाँ रहेको छ । यसैगरी संस्थाको तरलता रकम ४ करोड ५२ लाख २ हजार ६ सय २८ रुपैयाँ रहेको छ । सहकारीको सिद्धान्तबमोजिम कुल बचत रकमको कम्तिमा १५ प्रतिशत तरलताको व्यवस्था हुनुपर्नेमा यस सहकारीको तरलता २३ दशमलब २६ प्रतिशत रहेको छ ।
संस्थाले गत आर्थिक वर्ष २०८१/०८२ मा २ करोड ३१ लाख ५५ हजार ८ सय ४४ रुपैयाँ आम्दानी गर्दा २ करोड २५ लाख ५५ हजार ५ सय ७२ रुपैयाँ खर्च गरेको छ । साधारणसभाको अवसरमा नियमित मासिक बचतकर्ता सम्मानबाट महिलातर्फ शशी थापा र पुरुषतर्फ विनोद पुडासैनी सम्मानित भएका हुन् ।
यसैगरी, नियमित ऋणको किस्ता भुक्तानी गर्ने चन्द्रबहादुर थोकर, अधिकतम ऋण उपभोग गरी ब्याज भुक्तानी गर्ने बुद्धराज अर्याल, संस्थाका जेष्ठ सदस्यका रुपमा महिलातर्फ जानदेवी काफ्ले र पुरुषतर्फ मीनबहादुर प्रधान सम्मानित भएका हुन् । यस्तै गत वर्षको एसईई परीक्षामा उत्कृष्ट अंक ल्याएका छात्र विशेष अधिकारी र छात्रा स्वस्ती शाक्य सम्मानित भएका छन् । कार्यक्रममा संस्थाका संस्थापक अध्यक्ष बद्रीनाथ शर्माको प्रमुख आतिथ्य, वरिष्ठ सल्लाहकार ललितकुमार बस्नेतको विशिष्ट आतिथ्य र शेयर सदस्यहरुको उपस्थिति रहेको थियो ।
