हेटौँडा : चाडपर्वको समयमा सार्वजनिक सडकमा मादक पदार्थ सेवन (मापसे) गरी सवारीसाधन चलाएको भनी मकवानपुर प्रहरीले नियन्त्रणमा लिएको सवारी साधन जरिवाना गराएर छाडेको छ । मंगलबार हेटौँडा बजारका विभिन्न स्थानबाट मादक पदार्थ सेवन गरी सञ्चालन भइरहेका एउटा अटो र २३ वटा मोटरसाइकल नियन्त्रणमा लिइएको थियो ।
जिल्ला प्रहरी कार्यालय मकवानपुरका प्रवक्ता तथा प्रहरी नायब उपरीक्षक (डीएसपी) पुस्कर बोगटीका अनुसार नियन्त्रणमा लिएको सवारी साधनलाई ट्राफिक प्रहरीले जरिवाना गराएर छाडेको हो । मादक पदार्थ सेवन अहिले पनि प्रहरीले दैनिक रुपमा ५–१० वटा सवारी साधन नियन्त्रणमा लिने गरेको छ । यस्तै मंगलबार नै हेटौँडा बजार क्षेत्रबाट नियन्त्रणमा लिएको रुप परिवर्तन गरी ध्वनि प्रदुषण गर्ने ७ वटा मोटरसाइकललाई छठ पर्वपछि मात्र छोड्ने बताएको छ । मोटरसाइकलको पार्टपुर्जा परिवर्तन गरी ध्वनि प्रदुषण गरेको भनी सर्वसाधारणले आलोचना गरेपछि प्रहरीले कारवाही अगाडि बढाएको थियो । मोटरसाइकलको साइलेन्सर फेरेर र कानुन अनुसार जरिवाना गराएर छठ पर्वपछि मात्र साधन धनिको जिम्मा लागाउने डिएसपी बोगटीले बताउनुभयो ।
