हेटौँडा : बागमती प्रदेशका मुख्यमन्त्री बहादुर सिंह लामा बेलायत प्रस्थान गर्नुभएको छ । निजी कामको सिलसिलामा एक साताका लागि मुख्यमन्त्री लामा बेलायत जानुभएको हो ।
मुख्यमन्त्री लामा पारिवारिक काममा सहभागी हुन प्रमुख स्वकीय सचिव छत्रबहादुर लामासहित बुधबार बेलायत प्रस्थान गर्नुभएको हो । मुख्यमन्त्री लामा बेलायतमा छोरीको दीक्षान्त समारोहमा सहभागी हुन जानु भएको हो । बेलायतमा रहनुहुँदा मुख्यमन्त्री लामा धादिङ–नुवाकोट समाज र तामाङ समुदायद्वारा आयोजित औपचारिक कार्यक्रममा समेत सहभागी हुने कार्यक्रम रहेको बताइएको छ ।
मुख्यमन्त्री लामाको विदेश भ्रमण अवधिमा कृषि तथा पशुपन्छी विकास मन्त्री प्रकाश श्रेष्ठलाई कार्यवाहक मुख्यमन्त्री तोकिएको छ । प्रदेश प्रमुख दीपकप्रसाद देवकोटाले असार २५ गतेदेखि लागू हुने गरी श्रेष्ठलाई कार्यवाहकको जिम्मेवारी दिनुभएको हो ।
