हेटौँडा : बागमती प्रदेशको चालु पन्ध्रौँ अधिवेशन अन्त्य भएको घोषणा गरिएको छ । बुधबार बिहान प्रदेश सरकारको सिफारिसका आधारमा प्रदेश प्रमुख दीपकप्रसाद देवकोटाले बुधबार राती ११ः५९ बजेदेखि जारी हिउँदे अधिवेशन अन्त्य गरेको जानकारी दिनुभएको छ ।
संविधानको धारा १८३ को उपधारा (२) बमोजिम प्रदेश सभाको चालु पन्ध्रौँ अधिवेशन अन्त्य गरेको पत्र प्रदेश प्रमुख देवकोटाले प्रदेश सभाका सभामुखलाई लेख्नुभएको छ । प्रदेश सभा बैठक मंगलबारका लागि आव्हान गरे पनि प्रतिपक्षी दल नेकपा माओवादी केन्द्रका प्रदेश सभा सदस्यले बैठक सञ्चालन गर्न सहमत नभएपछि बुधबार १ बजेका लागि बैठक सारिएको थियो । प्रतिपक्षीले बजेटसम्बन्धी विवादका कारण प्रदेश सभा बैठक सञ्चालनमा अवरोध गर्ने भएपछि प्रदेश सरकारले अधिवेशन नै अन्त्य गर्न प्रदेश प्रमुखलाई सिफारिस गर्ने निर्णय गरेको हो ।
