प्रताप विष्ट, सदस्य, नेपाल रेडक्रस सोसाइटी तदर्थ समिति

हेटौंडाः संघीय सरकारले मकवानपुरका प्रताप विष्टलाई रेडक्रसको राष्ट्रिय समिति सदस्यमा मनोनित गरेको छ । सोमबार मन्त्रि परिषद् बैठकले आर्थिक अनियमितता गरेको आरोपमा नेपाल रेडक्रस सोसाइटीको कार्यसमिति भंग गरेर तदर्थ समिति गठन गर्ने निर्णय गरेको हो । रेडक्रस मकवानपुरका सदस्य रहनुभएका विष्ट पेशाले पत्रकार हुनुहुन्छ ।

मन्त्रिपरिषद्को सोमबार बसेको बैठकले सञ्जिव थापा सभापति भएको कार्यसमिति भंग गरेर मोरङ सिजुवाका नेत्रप्रसाद तिम्सिनाको अध्यक्षतामा तदर्थ समिति गठन गरेको हो । सरकारलाई जानकारी नदिई १६ अर्ब रुपैयाँ विदेशी सहायता लिएको, भक्तपुरमा जग्गा खरिदमा आनियमतता गरेको, रेडक्रसको केन्द्रीय कार्यालय, शाखा र उपशाखाको चल–अचल सम्पत्तिको दोहन गरी अनियमितता गरेको, समाज कल्याण र जिल्ला प्रशासनको निर्देशन पालना नगरेको, विधान तथा कानुन विपरीत काम गरेको, पदाधिकारीले आफ्नो पारिश्रमिक लिएको आरोपमा थापाका सभापति भएको कार्यसमिति भंग गरेको हो ।

सञ्जीव थापा नेतृत्वको समितिलाई सरकारले १० बुँदे स्पष्टिकरण सोधेको थियो । सरकारलाई पेश गरेको स्पष्टीकरण चित्तबुझ्दो नभएपछि कार्य समिति भंग गर्ने निर्णय भएको महिला बालबालिका तथा जेष्ठ नागरिक मन्त्री पार्वत गुरुङले जानकारी दिनुभएको छ । सरकारले गठन गरेको तदर्थ समितिलाई निर्वाचन गरी नया“ पदाधिकारी चयन गर्ने, संस्थालाई प्रदेश संरचना अनुसार व्यवस्थित गर्ने र शुद्धिकरण गर्ने जिम्मेवारी दिइएको छ । रेडक्रसको २०७५ चैतमा हुनुपर्ने निर्वाचनसमेत अझै हुन सकेको छैन । रेडक्रसको विधान विपरीत जिल्लाका सभापति, मन्त्री (सचिव) कम्तीमा २० देखि ४० वर्षसम्म एकै जना छन् ।