हेटौंडाः शिक्षक सेवा आयोगले सञ्चालन गरेको प्राथमिक तहको शिक्षक छनोट प्रक्रियाबाट सफल भएका शिक्षकहरुले नियुक्तिपत्र बुझेका छन् । शिक्षा विकास तथा समन्वय इकार्ई मकवानपुरले प्राथमिक तहका स्थायी शिक्षकको रुपमा मकवानपुर जिल्लामा सिफारिस भएका शिक्षकलाई आइतबार हेटौंडामा नियुक्तिपत्र प्रदान गरेको हो ।
शिक्षा तथा मानव स्रोत विकास केन्द्र, शिक्षक व्यवस्थापन समन्वय शाखा, भक्तपुरको सिफारिसअनुसार मकवानपुर जिल्लाका शिक्षकहरुलाई नियुक्तिपत्र दिइएको छ । मकवानपुरका प्रमुख जिल्ला अधिकारी स्किम श्रेष्ठले स्थायी शिक्षकमा नियुक्त भएकाहरुलाई नियुक्तिपत्र वितरण गर्नुभएको छ ।
नियुक्तिपत्र लिनका लागि पर्सा, दार्जुला, पाँचथर, रोल्पा, कालिकोट, बाजुरा, सिराहा, बारा, चितवन, मकवानपुरलगायत जिल्लामा बसोबास गरेर मकवानपुर जिल्लामा प्राथमिक तहका शिक्षकको रुपमा सिफारिस भएका शिक्षकहरुको उपस्थिति थियो । २ सय ७ जना प्राथमिक तहका स्थायी शिक्षकलाई नियुक्तिपत्र प्रदान गरिएको छ ।
काखमा सन्तान च्यापेर नियुक्तिपत्र लिनुको मज्जा बेग्लैः सुजिता
आइतबार नियुक्तिपत्र लिनेमध्ये एक हुनुहुन्छ– सुजिता अधिकारी । हेटौंडा–१७, निबासी २५ वर्षीया अधिकारी काखमा छोरा च्यापेर नियुक्तिपत्र लिन आउनुभएको हो । नियुक्तिपत्र लिएपश्चात उहाँकी अन्य शिक्षक खुसी साट्न र तस्वीर खिच्न व्यस्त हुँदा उहाँ भने नियुक्तिपत्रका साथ काखमा छोरालाई च्यापेर सुताउँदै हुनुहुन्थो ।
शिक्षण पेसा त्यसमाथि स्थायी शिक्षक भएपछि खुसीसँगै उहाँलाई समस्या पनि छ । छोरालाई काखमै च्यापेर अब बकैया गाउँपालिकामा अध्यापन गराउन जानुपर्ने बाध्यता उहाँलाई छ । अधिकारी भन्नुहुन्छ– ‘कक्षा–११ मा शिक्षाशास्त्र विषय पढ्दापढ्दै लोटस एकेडेमीबाट शिक्षण पेसा सुरु गरियो ।’ १७ वर्षकै उमेरदेखि शिक्षण पेसामा लाग्नुभएकी अधिकारीको संघर्ष समाजको लागि प्रेरणादायी छ ।
हाम्रो समाजमा अहिले पनि छोरीलाई हेर्ने दृष्टिकोण फेरिएको छैन । तर, उहाँले विवाहित भएर एक सन्तानका आमा हुँदा पनि संघर्ष गर्न छोड्नु भएको छैन । सुजिताको श्रीमान पनि शिक्षक हुनुहुन्छ । घरको कामधन्दा गर्नुपर्ने दायित्व पनि उहाँलाई छ । ‘श्रीमान बुझ्ने हुनुहुन्छ । उहाँकै प्रेरणाबाट मैले यो सफलता प्राप्त गर्न सकेको हुँ’, अधिकारी भन्नुहुन्छ– ‘बिहान ६ बजेदेखि राति ९ बजेसम्म भ्याई नभ्याई हुन्थ्यो ।’
दिनभर हेटौंडा–१७ स्थित बालबोध माध्यमिक विद्यालयमा निजी स्रोतको शिक्षकका रुपमा कार्यरत अधिकारीले बेलुका ६ बजेदेखि ९ बजेसम्म खाना बनाउँदै अनलाइन कक्षा लिनुहुन्थ्यो । बाध्यतासँगै चुनौतिका बिच उहाँले दोस्रो पटकको प्रयासमा प्राथमिक तहको तृतीय श्रेणीमा नाम निकाल्न सफल हुनुभएको हो । उहाँ भन्नुहुन्छ– ‘मिहिनेत गरेर पढेपछि सफलता पाइने रहेछ ।’ २०७८ सालमा पहिलो प्रयास असफल भए पनि दोस्रो प्रयासको सफलताले बुहारीले पनि केही गर्न सक्छ र उच्च शिक्षा लिएर आत्मनिर्भर बन्न सक्छ भनेर यो समाजलाई सावित गराउन सकेको भन्दै उहाँले खुसी व्यक्त गर्नुभएको ।
२० वर्षकै उमेरमा नाम निकाल्न सफल सन्ध्या
२० वर्षको उमेरमै प्राथमिक तहको तृतीय श्रेणी स्थायी शिक्षकमा नाम निकाल्न सफल सन्ध्याकुमारी मुखियाको संघर्ष पनि कम छैन । शिक्षाशास्त्र संकायमा स्नातक तह दोस्रो वर्षमा अध्ययनरत मुखिया मधेसी समुदायबाट प्रतिनिधित्व गर्दै सानै उमेरमा सरकारी जागिरे हुन सफल हुनुभएको छ ।
प्रायः मधेसी समुदायमा छोरीलाई पढाउनु हुँदैन भन्ने छ । त्यस धारणालाई गलत सावित गर्दै सन्ध्याले छोरीलाई पनि पढाए सरकारी जागिरे भएर आत्मनिर्भर बन्न सक्छ भन्ने कुरा सावित गर्नुभएको छ । उहाँ भन्नुहुन्छ– ‘२०८० सालमा शिक्षण अध्यापन अनुमतिपत्र (लाइसेन्स) प्राप्त गर्न सफल भइयो । त्यसलगत्तै वीरगञ्ज पाठशालामा अध्यापन गराउँदै आएको थिएँ । अहिले मकवानपुरमा जागिर खाने मौका जुरेको छ ।’ ठाकुरराम बहुमुखी क्याम्पसमा पढ्दै गर्नुभएकी सन्ध्याले जागिरसँगै पढाइलाई निरन्तरता दिनुपर्ने बाध्यता आएको बताउनुभयो ।
पर्साको विन्ध्यबासिनी गाउँपालिका–२ देखि मकवानपुरको विकट कैलाश गाउँपालिकामा पुगेर जागिर खानुपर्ने अवस्था आएको उहाँले जानकारी दिनुभयो । जागिरसँगै मकवानपुरको हावापानी महसुस गर्ने र ग्रामीण क्षेत्रको शिक्षाको विकासमा केही योगदान गर्ने सुनौलो अवसर भएको उहाँको भनाइ छ ।
