हेटौँडाः हेटौँडा–४ स्थित ब्रह्मदिक् एकेडेमीको वार्षिक खेलकुद सप्ताहको उद्घाटन समारोह सम्पन्न भएको छ । गत सोमबारदेखि नै सप्ताहव्यापी खेलकुद कार्यक्रमको सुरुवात भए पनि बुधबार औपचारिक रुपमा उद्घाटन समारोह भएको हो । हेटौँडा–५ स्थित पिप्ले–क्याम्पा रंगशालामा ५ नम्बर वडा अध्यक्ष सुशील घिमिरेले खेलकुद सप्ताहको उद्घाटन गर्नुभयो ।
बुधबार विद्यालयदेखि पिप्ले–क्याम्पा रंगशालासम्म साँस्कृतिक झाँकीसहित विद्यार्थीको र्याली निकालिएको थियो । विद्यार्थीहरु विभिन्न जातीय पोशाकमा सजिएका थिए । आगामी आइतबारसम्म सञ्चालन हुने वार्षिक खेलकुद कार्यक्रममा सबै विद्यार्थीको सहभागिता रहने गरी विविध खेलकुद समावेश गरिएको प्रिन्सीपल रामबाबु सापकोटाले जानकारी दिनुभयो । उद्घाटन समारोहमा निजी तथा आवासीय विद्यालय अर्गनाइजेशन नेपाल (प्याव्सन) हेटौँडा उपमहानगर समितिका अध्यक्ष रामकुमार श्रेष्ठ, सचिव सुदीप राज गिरीको पनि आतिथ्य रहेको थियो । १० कक्षासम्म पठनपाठन हुने ब्रह्मदिक् एकेडेमीमा ८ सय ५० जना विद्यार्थी अध्ययनरत छन् ।
