हेटौँडा ः विज्ञान शिक्षक समाज मकवानपुरको आयोजनामा एक दिने विज्ञान विषयको प्रश्नपत्र निर्माण सम्बन्धी तालिम हुने भएको छ । यहि माघ २६ गते शनिबार तालिम हुँदैछ ।
समाजले मकवानपुर जिल्लाभरका कक्षा ४ कक्षादेखि १० कक्षासम्मको विज्ञान विषयको प्रश्नपत्र निर्माण सम्बन्धमा शिक्षकहरुलाई तालिम दिन लागेको हो । २०७६ सालदेखि नयाँ पाठ्यक्रम लागू भएको हुँदा शिक्षकहरुलाई प्रश्नपत्र निर्माणमा समस्या नहोस् भन्ने उद्देश्यले तालिमको आयोजना गरिएको विज्ञान शिक्षक समाजका सचिव सुवास खनालले जानकारी दिनुभयो ।
प्रश्नपत्र बनाउन सक्षम भएपछि विद्यालय वा पालिकामा प्रश्नपत्र निर्माण सम्बन्धी समस्या कम हुँदै जाने उहाँको विश्वास छ । तालिम हेटौँडा–२ स्थित सिद्धार्थ माध्यामिक विद्यालयमा हुनेछ । तालिममा यस वर्ष ६० जना शिक्षक सहभागी हुने अनुमान गरिएको छ । तालिममा विज्ञान शिक्षक समाजकै शिक्षकहरुले सहजीकरण गर्नुहुनेछ ।
