हेटौँडा ः मकवानपुरको राक्सिराङ्ग गाउँपालिकामा राष्ट्रपति रनिङ सिल्ड खेलकुद प्रतियोगिता सुरु भएको छ । सोमबार सुरु भएको प्रतियोगिता मंगलबारसम्म सञ्चालन हुनेछ ।
राक्सिराङ्ग गाउँपालिका–३, पलाँसेस्थित सूर्योदय माध्यमिक विद्यालयको खेल मैदानमा सोमबार गाउँपालिकाका अध्यक्ष राजकुमार मल्लको प्रमुख आतिथ्यमा प्रतियोगिताको उद्घाटन समारोह भएको थियो । राष्ट्रपति रनिङ सिल्ड खेलकुद प्रतियोगिता आयोजक समितिका संयोजक गाउँपालिकाका उपाध्यक्ष वनस्थम थिङको अध्यक्षतामा उद्घाटन समारोह भएको हो । प्रतियोगितामा राक्सिराङ्ग गाउँपालिकाका ६ वटा माध्यमिक विद्यालय र ३ वटा आधारभूत विद्यालयका एक सय भन्दा बढी विद्यार्थी सहभागी रहेको शिक्षा अधिकृत पंकश थारुले जानकारी दिनुभयो ।
साविक विजेता सूर्योदय माध्यमिक विद्यालयको आतिथ्यमा प्रतियोगिता आयोजना भएको हो । प्रतियोगितामा एथ्लेटिक्स, भलिबल, कबड्डी लगायतका खेल समावेश गरिएको छ । पालिकास्तरीय प्रतियोगितामा छनोट भएका खेलाडीहरु जिल्लास्तरीय प्रतियोगितामा सहभागी हुनेछन् । ५२ वटा सामुदायिक विद्यालय र २ वटा संस्थागत विद्यालय रहेको राक्सिराङ्ग गाउँपालिकामा ५ हजार भन्दा बढी विद्यार्थी विद्यालय तहमा अध्ययनरत छन् ।
