हेटौँडा ः लागूऔषध सेवन गरी सुमो चलाउने एकजनालाई मकवानपुर प्रहरीले पक्राउ गरेको छ । आइतबार भैँसे–हेटौँडा सडकखण्डको बाघझोरामा प्रहरी र जनस्वास्थ्य कार्यालय मकवानपुरको स्वास्थ्यकर्मीसहितको टोलीले चालकको स्वास्थ्यजाँच गर्ने क्रममा सर्लाहीबाट काठमाडौं जाँदै गरेको ना १ ज ४६१९ नम्बरको सुमोचालक सर्लाही जिल्लाको बरहथवा नगरपालिका–८ का ३२ वर्षीय फेमस खड्कालाई लागूऔषध सेवन गरी सुमो चलाउँदै गरेको पाइएको प्रहरीले जनाएको छ ।
आइतबार बिहान ११ बजेर ३० मिनेटदेखि दिउँसो ४ बजेसम्ममा ५२ जना सवारी साधनका चालकको स्वास्थ्यजाँच गरिएको थियो । प्रहरी र स्वास्थ्यकर्मीको टोलीले स्वास्थ्य जाँच गर्ने क्रममा काठमाडौंबाट हेटौँडातर्फ आउँदै गरेको ना १ ज ७०२८ नम्बरको सुमो चालक हेटौँडा–८ का ३६ वर्षीय सुजन गुरुङलाई मादक पदार्थ सेवन गरी सुमो चलाएको पाइएपछि पक्राउ गरिएको छ । लागूऔषध र मादक पदार्थ सेवन गरी सुमो चालउने चालकहरुलाई नियन्त्रणमा लिएर आवश्यक कारवाहीको प्रक्रिया अगाडि बढाएको जिल्ला प्रहरी कार्यालय मकवानपुरले जनाएको छ ।
