हेटौंडाः बागमती प्रदेश लिग फुटबल प्रतियोगिताको फाइनल खेल आज हुँदैछ । हेटौंडा–५ स्थित पिप्ले–क्याम्पा रंगशालामा आज शनिबार हुने फाइनल खेलमा काठमाडौंको चित्लाङ फुटबल क्लब र दोलखाको टाइगर टिम तिखाताबीच प्रतिस्पर्धा हुने भएको छ ।
बिहीबार सम्पन्न सेमिफाइनल खेलमा काठमाडौंले ललितपुरलाई पराजित गरेसँगै काठमाडौं फाइनलमा प्रवेश गरेको हो भने बुधबार सम्पन्न सेमिफाइनल खेलमा दोलखाले सिन्धुलीलाई हराउँदै फाइनलमा स्थान पक्का गरेको थियो । प्रदेशका १३ जिल्लामध्ये ११ जिल्लाको लिग विजेता फुटबल क्लबको सहभागिता रहेको प्रतियोगिताको विजेताले २ लाख रुपैयाँसहित शिल्ड, मेडल तथा प्रमाणपत्र र उपविजेता टिमले १ लाख रुपैयाँसहित शिल्ड, मेडल तथा प्रमाणपत्र प्राप्त गर्नेछन् । यस्तै, विधागत उत्कृष्ट खेलाडीहरुका लागि पनि पुरस्कारको व्यवस्था गरिएको छ ।
