हेटौँडाः रामेछाप जिल्लाको मन्थली नगरपालिका–१, भैसेश्वरमा गुडिरहेको टिफरको ढालाबाट खसेर एक जना पुरुषको मृत्यु भएको छ । मृत्यु हुनेमा मन्थली नगरपालिका–४ सालु अर्चलेका ३२ वर्षीय नारायण बस्नेत रहेको बागमती प्रदेश प्रहरी कार्यालय हेटौँडाले जानकारी दिएको छ ।
आइतबार दिउँसो १ बजेर ३० मिनेटको समयमा सुकाजोरबाट मन्थली सालुतर्फ बालुवा लिएर जाँदै गरेको प्रदेश न ३ ०१–००३ क ५७६४ नम्बरको गुडिरहेको टिफरको ढालाबाट खसेर बस्नेत घाइते भएका थिए । घाइते बस्नेतलाई उपचारका लागि मन्थली अस्पताल लगिएकोमा उपचारको क्रममा दिउँसो २ बजेर १० मिनेटको समयमा डाक्टरले मृत घोषणा गरेको प्रहरीले जानकारी दिएको छ । टिफर र चालक मन्थली नगरपालिका–५, सुनारपानी बस्ने ३४ वर्षीय कुमार कार्कीलाई जिल्ला प्रहरी कार्यालयले नियन्त्रणमा लिएको छ ।
