हेटौँडा ः धादिङ जिल्लाको बेनिघाट रोराङ गाउँपालिका–३, रिचोकटारको भित्रि सडकखण्डमा रोकिराखेको ट्रकमा मोटरसाइकल ठोक्किएर दुर्घटना हुँदा मोटरसाइकल चालकको मृत्यु भएको छ । शुक्रबार राती १० बजेर ५० मिनेटको समयमा भित्रि सडकखण्डमा मलेखुबाट खानीगाउँतर्फ जाँदै गरेको बा प्र ०३–०१३ प ७८०१ नम्बरको मोटरसाइकल रोकिराखेको बा प्र २–०३–००१ क ००६३ नम्बरको ट्रक पछाडि ठोक्किएर दुर्घटना भएको बागमती प्रदेश प्रहरी कार्यालय हेटौँडाले जानकारी दिएको छ ।
मोटरसाइकल चालक बेनिघाट रोराङका २४ वर्षीय रामकृष्ण कँडेल र पछाडी सवार १६ वर्षीया सुजिता घले गम्भीर घाइते भएका थिए । घाइते दुबैलाई उपचारका लागि राजमार्ग अस्पताल मलेखु लगिएको थियो । उपचारको क्रममा चालक कँडेलको राती ११ बजेर ३० मिनेटको समयमा मृत्यु भएको प्रहरीले जानकारी दिएको छ । पछाडी सवार घलेलाई थप उपचारका लागि काठमाडौंस्थित केएमसी अस्पताल लगिएको छ । ट्रक चालक बेनिघाट रोराङका २६ वर्षीय कुमार परियारलाई प्रहरीले नियन्त्रणमा लिएको छ ।
