हेटौंडाः नेपाल कम्युनिष्ट पार्टी (एमाले) हेटौंडा उपमहानगरपालिका कमिटीको सपथ ग्रहण तथा पदभार कार्यक्रम सम्पन्न भएको छ । हेटौँडा–५ स्थित नेकपा एमाले पार्टी कार्यालयमा एक कार्यक्रमबीच बोलबहादुर कार्की नेतृत्वको नवनिर्वाचित हेटौँडा उपमहानगरपालिका कमिटीका पदाधिकारी तथा सदस्यले सपथग्रहण गरेका हुन् ।
मंसिर ३० गते नगरकमिटीको अधिवेशन भएको थियो । पुस १ गते भएको निर्वाचनबाट कार्की नेतृत्वको नगर कमिटी चयन भएको थियो । बिहीबार एमाले पार्टी कार्यालयमा नव निर्वाचित अध्यक्ष बोलबहादुर कार्कीलाई एमाले केन्द्रीय सदस्य एवम् मकवानपुर जिल्ला इन्चार्ज रामेश्वर रानाले सपथ गराउनु भयो । सपथग्रहणपछि अध्यक्ष कार्कीले उपाध्यक्ष, सचिव, सहसचिव, कोषाध्यक्ष र सदस्यहरुलाई सपथ ग्रहण गराउनु भयो । कार्यक्रममा नवनिर्वाचित अध्यक्ष कार्कीलाई निवर्तमान अध्यक्ष शालिकराम पुडासैनीले माइन्युट हस्तान्तरण गर्नु भयो ।
सपथग्रहण समारोहलाई सम्बोधन गर्नुहुँदै नेकपा एमाले मकवानपुरका अध्यक्ष श्रीधर पोखरेलले पार्टीभित्र गुट–उपगुट नगरहेको र पार्टीका नेता, कार्यकर्ताले एक ढिक्का भएर काम गर्नुपर्ने बताउनुभयो । कार्यक्रममा नेकपा एमाले बागमती प्रदेश कमिटी सदस्य अनन्तप्रसाद पौडेलको पनि उपस्थिति रहेको थियो ।
