हेटौँडाः बागमती प्रदेश सरकारले प्रदेश प्राविधिक तथा व्यावसायिक शिक्षा एवम् तालिम परिषद् (सिटीइभिटी) को प्रमुख कार्यकारी निर्देशक नियुक्तिको तयारी गरेको छ । प्रदेश सरकारले खुल्ला प्रतिस्पर्धा मार्फत् प्रमुख कार्यकारी निर्देशकका लागि उम्मेदवार सिफारिस समेत गरेको छ ।
प्रदेशको सामाजिक विकास मन्त्रालयले दरखास्त आह्वान गरी परीक्षा तथा अन्तरवार्ता समेत सम्पन्न गरेर नियुक्तिका लागि ३ जना उम्मेदवार सिफारिस गरेको छ । मन्त्रालयका सचिव बद्रीनाथ गैरेको संयोजकत्वमा रहेको प्रमुख कार्यकारी निर्देशक छनोट तथा सिफारिस समितिले प्रमुख कार्यकारी निर्देशकका लागि ३ जना उम्मेदवारको नाम सिफारिस गरेको हो ।
समितिको सिफारिस अनुसार प्रदेश सरकारको आगामी मन्त्रिपरिषद बैठकले प्रमुख कार्यकारी नियुक्त गर्ने तयारी गरिएको प्राविधिक तथा व्यावसायिक शिक्षा एवम् तालिम परिषद्ले जनाएको छ । उक्त पदमा ७ जनाको दरखास्त परेकोमा सिफारिस समितिले ५ जनाको नाम संक्षिप्त सूचिमा समावेश गरेको थियो । संक्षिप्त सूचिमा परेका ५ उम्मेदवारको गत पुस १ मा अन्तरवार्ता भएको थियो । उक्त अन्तवार्ताको नतिजा अनुसार प्रमुख कार्यकारी निर्देशक पदका लागि ३ जनाको नाम सिफारिस गरिएको हो ।
सिफारिस समितिले मध्यपुरठिमी नगरपालिका–९ का बद्री प्रसाद दहालको नाम पहिलो नम्बरमा सिफारिस गरेको छ भने म्यागङ–४, नुवाकोटकी शान्ति लामा दोस्रो र भरतपुर–१०, चितवनका इश्वरचन्द्र पौड्यालको नाम तेस्रो स्थानमा रहेको छ । अन्तरवार्तामा छनौट भएका भरतपुर–१, चितवन रमेश रिमाल र मन्थली, रामेछापका नविन राज दाहाल भने फालिएका छन् ।
दाहाल र लामा नेपाली कांग्रेस निकट मानिन्छन् भने पौड्याल माओवादी केन्द्र निकट रहेको बुझिएको छ । दाहाललाई प्रमुख कार्यकारी निर्देशक बनाउनका लागि कांग्रेसको शिर्ष नेतृत्वसहित सामाजिक विकास मन्त्री हरिप्रभा खड्गीको जोडबल रहेको छ भने लामालाई मुख्यमन्त्री बाहदुर सिंह लामाको बलियो साथ रहेको छ । प्रमुख कार्यकारी निर्देशकमा मुख्मयन्त्री लामाको साथ पाएकी शान्ती लामाको सम्भावनाको सम्भावना उच्च रहेको बताइएको छ ।
