हेटौंडाः लायन्स क्लब अफ हेटौंडा स्मारकले मकवानपुरको भीमफेदी–६, माण्डुस्थित मण्डलादेवी प्राथमिक विद्यालयलाई कार्पेट हस्तान्तरण गरेको छ । आइतबार २६ हजार रुपैयाँको कार्पेट र म्याट हस्तान्तरण गरिएको लायन्स क्लब अफ हेटौंडा स्मारकका कार्यक्रम संयोजक जीवन छत्कुलीले जानकारी दिनुभयो ।
क्लबका अध्यक्ष अन्जनप्रसाद पौडेलको नेतृत्वमा विद्यालयमै पुगेर विद्यालयकी प्रधानाध्यापक अनिशा डोटेललाई कार्पेट र म्याट हस्तान्तरण गरिएको हो । कक्षा ३ सम्म अध्ययन हुने विद्यालयमा २५ जना विद्यार्थी पढ्ने एक कोठे भवनका लागि उक्त सामग्री प्रयोग हुने उहाँले बताउनुभयो ।
बेन्च ठूलो भएपछि विद्यार्थी जाडो याममा पनि भुईंमै बसेर अध्ययन गर्दै आइरहेका थिए । कार्यक्रममा लियो क्लब अफ मकवानपुरका उपाध्यक्ष सुशान्त खतिवडाको पनि उपस्थिति थियो ।
