हेटौंडाः मकवानपुरको थाहा नगरपालिकामा भएको थाहा नगरपालिका अन्तर माविस्तरीय राष्ट्रपति रनिङ शिल्ड प्रतियोगिताको उपाधि जनकल्याण माध्यमिक विद्यालयले जितेको छ । कार्तिक २९ गते सुरु भएर मंसीर १ गते शनिबार सम्पन्न भएको सातौं संस्करणको अन्तर माविस्तरीय राष्ट्रिपति रनिङ शिल्डको उपाधि वडा–३, स्थित जनकल्याण माविले जितेको हो । उपाधि जितेको जनकल्याणले २८ वटा स्वर्ण र १० वटा रजत पदक तथा २५ हजार रुपैयाँको नगद राशि प्राप्त गर्दै उपाधि चुम्न सफल भएको हो ।
उपविजेता विजेता बनेका थाहा–९ स्थित चित्लाङको भैवर माध्यमिक विद्यालयले ८ वटा स्वर्ण, ५ रजत र १ कास्य पदकसहित १५ हजार रुपैया नगद राशि प्राप्त गरेको छ भने २ वटा स्वर्ण, ७ वटा रजत र ९ वटा कास्य पदक सहित थाहा–१ स्थित सुनौलो माध्यमिक विद्यालयले तृतीय स्थानमा चित्त बुझाउँदै १० हजार रुपैयाँको नगद राशि प्राप्त गरेको छ ।
मेयर कप भलिबल प्रतियोगितामा छात्र तर्फ स्वचछन्द भैरव माध्यमिक विद्यालय प्रथम हुँदा छात्रातर्फ मत्स्यनारायण माध्यमिक विद्यालय प्रथम भएको छ । यस्तै मत्स्यनारायण भैरव माध्यमिक विद्यालय छात्रतर्फ द्वितीय हुँदा नाटेश्वरी माध्यमिक विद्यालय छात्रातर्फ द्वितीय भएको छ । उपाधि विजेता १५ हजार रुपैयाँसहित शिल्ड, मेडल तथा प्रमाणपत्र प्राप्त गरेको छ भने उपविजेता टिमले १५ हजार रुपैयाँसहित शिल्ड, मेडल तथा प्रमाणपत्र प्राप्त गरेको छ । थाहा नगर खेलकुद विकास समितिका अध्यक्ष टिकाराम स्याङ्तानको सभाध्यक्षमा तथा थाहा नगर प्रमुख विष्णु बहादुर बिष्टको प्रमुख आतिथ्यमा पुरस्कार वितरण समारोह भएको हो ।
