हेटौंडाः यही मंसिर १६ गते हुने स्थानीय तह उपनिर्वाचनमा हेटौँडा उपमहानगरपालिका वडा नम्बर १२ को अध्यक्ष पदका लागि राष्ट्रिय स्वतन्त्र पार्टी (रास्वपा) का आशावीर बलले मनोनयन दर्ता गराउनुभएको छ । हेटौंडा–१२ मै स्थापना गरिएको निर्वाचन कार्यालयमा आइतबार बिहान पुगेर बलले मनोनयन दर्ता गराउनुभएको हो ।
उहाँले राजदेव लामाको प्रस्ताव र चन्द्र बहादुर स्याङ्तानको समर्थनमा मनोनयन दर्ता गराउनुभएको हो । २०७९ सालमा सम्पन्न स्थानीय तहको निर्वाचनमा निर्वाचित हुनुभएका माओवादी केन्द्रका ललित बहादुर घलान जिल्ला समन्वय समिति मकवानपुरको प्रमुख बन्नुभएसँगै हेटौंडा–१२ को अध्यक्ष पद रिक्त रहेको थियो ।
