हेटौंडाः निजी तथा आवासीय विद्यालय अर्गनाइजेशन नेपाल (प्याव्सन) मकवानपुरका पूर्वअध्यक्ष एवम् केन्द्रीय सल्लाहकार आशिष श्रेष्ठ बिहीबार नेपाली कांग्रेसमा प्रवेश गर्नुभएको छ । नेपाली कांग्रेस बागमती प्रदेश संसदीय दलका नेता एवम् कांग्रेस मकवानपुरका सभापति ईन्द्रबहादुर बानियाँले नेपाली कांग्रेसको सदस्यता दिई खादा ओढाएर श्रेष्ठलाई पार्टीमा स्वागत गर्नुभएको थियो ।
पार्टी प्रवेश कार्यक्रममा बोल्दै नेता बानियाँले श्रेष्ठको योगदान र पार्टीमा निरन्तरताको आधारमा पार्टीमा जिम्मेवारी दिने बताउँदै उहाँको प्रवेशले कांग्रेस थप मजवुत र संगठित हुन सहयोग पुग्ने बताउनुभयो । कांग्रेसमा प्रवेश गरेपछि बोल्दै श्रेष्ठले देशलाई निकास दिन र समृद्धि दिलाउन कांग्रेस मात्रैले सक्ने भएकाले कांग्रेसमा प्रवेश गरेको बताउनुभयो । पार्टी प्रवेश कार्यक्रममा कांग्रेस बागमती प्रदेश संसदीय दलकी प्रमुख सचेतक राधा घले, कांग्रेस हेटौंडा उपमहानगर समितिका सभापति आनन्दराम पराजुली, तरुण दल हेटौंडा उपमहानगर सभापति सुनिल गिरीलगायतको उपस्थिति रहेको थियो ।
