हेटौँडाः मंगलबार धादिङ जिल्लाको गंगाजमुना गाउँपालिका–४ स्थित एर्सामा ट्याक्टर दुर्घटना हुँदा चालककोे मृत्यु भएको छ । भित्री कच्ची सडकखण्डमा फुलखर्कबाट सातदोबाटोतर्फ जाँदै गरेको ग १ त ५३०० नम्बरको ढुङ्गा लोड गरेको ट्याक्टर आफैं अनियन्त्रित भएर सडकमा पल्टिदा चालक गंगाजमुना–५ का २१ वर्षीय आकाश विकको मृत्यु भएको हो ।
बागमती प्रदेश प्रहरी कार्यालय हेटौंडाका अनुसार मंगलबार बिहान ९ बजेर ४५ मिनेटको समयमा दुर्घटना हुँदा चालक विक गम्भीर घाइते भएका थिए । उनलाई उपचारका लागि स्थानीय अस्पताल फुलखर्क पठाइएकोमा सामान्य उपचार पश्चात थप उपचारका लागि जिल्ला अस्पताल धादिङवेशी लगिएको थियो । जिल्ला अस्पतालमा लगिएको उपचारको क्रममा मंगलबार दिउँसो २ बजेर २० मिनेटको समयमा डाक्टरले विकलाई मृत घोषणा गरेको प्रहरीले जानकारी दिएको छ ।
